Ámeldegi joybarlar

Házirgi waqıtta  Qaraqalpaǵıstan awılxojalıǵı hám agrotexnologiyalar institutında Germaniyanıń Xalqara sheriklik shólkemi(GIZ)niń «Ózbekstannıń saylanǵan aymaqlarında turaqlı ekanomikalıq rawajlanıw» joybarınıń «Balıqshılıqtı rawajlandırıw» dástúri ámelge asırılmaqda.Joybar 2020-2023-jıllar dawamında institutımızda ámelge asırılıwı belgilengen. Joybardıń jámi bahası 240,000 AQSh dollardı quraydı.

 Joybar sheńberinde GIZdiń grant qarjıları esabınan institutımızda balıq jetistiriw ushın jabıq suw sisteması engizildi hám jabıq suw sistemasına balıqlardıń bir jıllıq shabaqları sazan, aq amur hám afrika ılaqaları túrlerin jetistiriw isleri alıp barılmaqda. Bunnan tısqarı bir seminar xanası hám bir laboratoriya xanası joybar sheńberinde shólkemlestirildi.

Ámeldegi joybarlar

         Házirgi waqıtta filialımızda Ózbekstannıń awıl xojalıǵına qánigelestirilgen 4 joqarǵı oqıw ornı: Tashkent mámleketlik agrar universiteti, Andijan awıl xojalıǵı institutı, Samarqanda awıl xojalıǵı institutı, Tashkent mámleketlik agrar universitetiniń Nókis filialı hám Evropanıń 4 joqarǵı oqıw ornı: Italiyanıń Piza hám Padova universitetleri, Estoniyanıń ómir tuwralı ilimler universiteti, Portugaliyanıń Portu universiteti menen birgelikte Evropa Awqamınıń ERASMUS+ bilimlendiriw tarawında xalıqaralıq birge islesiwdi rawajlandırıw baǵdarlamasınıń 586000-ERR-1-2017-RT-ERRKA2-SVNE-JP BUZNET: «Ózbekistanda veterinariya tarawın sistemalı oqıtıw» joybarı ámelge asırılmaqta.

         Joybardıń maqseti Ózbekstanda veterinariya tarawı boyınsha jetik kadrlardı tayarlaw, JOOlarında veterinariyanı oqıtıw boyınsha aralas tálimdi jolǵa qoyıw esaplanıp, usı maqsetti iske asırıw ushın birge islesiwshi JOOları ortasında tájiriybe almasıw ámelge asırıladı. Sonday-aq, bul tájiriybe almasıwlar tek veterinariya tarawı boyınsha bilimlendiriwdi emes, al óndiris orınlarında (mal fermaları, sútti qayta islew kárxanaları, sharwashılıq xojalıqları) da ámeliy tájiriybe almasıwdı kózde tutadı. Joybar sheńberinde 2018-jıl 19-20-mart kúnleri  filialımızda eki kúnlik ilimiy-ámeliy seminar ótkerildi. Seminarǵa Avgusto  Faustino hám Mariya  Grasa Lopes Portugaliyanıń Portu universitetinen, Devid Erney Estoniyanıń Estoniya Ómirlik ilimler universitetinen, Stefano Romagnoli hám Antonio Mollo Italiyanıń Padova universitetinen filialımızǵa keldi. Seminar dawamında filial direktorı E.Toreniyazov, Joqarǵı bilimlendiriwdi rawajlandırıw boyınsha ekspertler toparı aǵzası B.Paluanov “Qaraqalpaqstan joqarǵı oqıw orınlarında Evropa awqamı Erasmus+ joybarları» temasında, BUZNET joybarı bas koordinatorı, professor Avgusto  Faustino joybar maqseti hám wazıypaları, ámelge asırıw procesi, kútiletuǵın nátiyjeler haqqında prezentaciyalar isledi. Sonıń menen birge, joybar sheńberinde miymanlar Xojeli, Qaraózek rayonları hám Nókis qalasındaǵı sharwashılıq fermaları hám sútti qayta islew kárxanalarına ámeliy sapar etti.

         Joybar sheńberinde shólkemlestirilip atırǵan oqıw kursında qatnasıw maqsetinde “Zootexniya hám veterinariya” kafedrası baslıǵı S.Eshmuratova hám “Awıl xojalıǵı ónimlerin saqlaw, dárilik ósimliklerdi jetistiriw hám qayta islew texnologiyası” kafedrası assistenti Sh.Shaniyazov 2018 jıl 22 oktyabr` – 22 dekabr` aralıǵında Italiya mámleketiniń Piza hám Padova universitetleri, Portugaliya mámleketiniń Portu universiteti hám Estoniya mámleketiniń Ómirlik pánler universitetlerine sayaxat etti.