«Karera kúni-miynet yarmarkası» bolıp ótti

«Karera kúni-miynet yarmarkası» bolıp ótti

Ózbekstan Respublikası Prezidenti basshılıǵında 2022-jıl 4-mart kúni ótkerilgen videoselektor májlisinde joqarı oqıw orınları studentleriniń bántligin támiyinlew arqalı olardıń turmıs dárejesin jaqsılaw ilajları boyınsha qatar wazıypalar belgilep berilgen edi.

Usı wazıypalardıń orınlanıwın támiyinlew maqsetinde Qaraqalpaqstan awıl-xojalıǵı hám agrotexnologiyalar institutında «Karera kúni-miynet yarmarkası» bolıp ótti.

Yarmarkanı institut rektorı E.Tóreniyazov kiris sóz benen ashtı. Onnan soń Qaraqalpaqstan Respublikası Kambaǵallıqtı qısqartıw hám bántlik Ministrligi bólim baslıǵı Sh.Ataev, «Ámiwdárya Tekstil» JShJ niń kadrlar bólimi baslıǵı I.Abdullaev hám bir qatar mekeme shólkem wákilleri shıǵıp sóyledi.

Yarmarkaǵa 40 tan aslam mekeme hám shólkemler ózleriniń bos jumıs orınları menen qatnastı. Atap aytqanda, Qaraqalpaqtan Respublikası Kambaǵallıqtı qısqartıw hám bántlik Ministrligi tárepinen 72 den aslam vakant orınları, Qaraqalpaqtan Respublikası Ósimlikler karantini hám qorǵaw agentligi inspektor lawazımına, «Ámiwdárya Tekstil» JShJ mexanik, operator, selesor, laborant bos jumıs orınları menen qatnastı.

Yarmarka dawamında «Ámiwdárya Tekstil» JShJne institutta tálim alıp atırǵan Ámiwdárya rayonında jasawshı student jaslardı bos orınlarǵa qabıllawı, olardıń xızmet wazıypaları, olardıń is haqısı haqqında studentlerge maǵlıwmatlar berildi.

Sonday-aq, yarmarkada Qaraqalpaqstan Respublikası Qarakól birlespesi, Qaraqalpaqstan Respublikası Jumısqa márhámat Monoorayı, Qaraqalpaqstan Respublikası Xojeli rayonı haywanlar keselligi diagnostikası hám azıq-awqat ónimleri qáwipsizligi mekemeleri de vakant orınları menen qatnastı.

Miynet yarmarkasın ótkeriwden tiykarǵı maqset-student jaslarǵa jumıs beriwshiler menen tuwrıdan-tuwrı sáwbetlesiw arqalı jumıs tabıwına imkaniyat jaratıw, kadrlarǵa zárúrligi bar mekemelerge kerekli kadrlardı tańlawda ámeliy járdem kórsetiw, sonday-aq, pitkeriwshi jaslardıń jumısqa jaylasıw imkaniyatları, aymaqlıq miynet bazarı haqqında túsiniklerin qáliplestiriwden ibarat.