Búgingi kúni dún`ya júzindegi 43 ten aslam joqarı oqıw orınları hám ilimiy izertlew orayları menen birge islesip kiyatırǵan Tashkent mámleketlik agrar universitetiniӊ Nókis filialı áyne kúnleri Rossiyadaǵı bir qatar joqarı oqıw orınları menen bakalavr hám magistratura baǵdarında oqıwdı qálewshi jaslardı oqıwǵa qabıllaw boyınsha bir qansha unamlı ilajlardı ámelge asırıp kelmekte.

Atap aytqanda, 14-iyul` kúni bir neshe jaslar  Qubla Ural mámleketlik agrar universitetiniӊ mexanizaciya hám agranomiya qánigelikleri boyınsha bakalavr tálim baǵdarına Birden-bir mámleketlik imtixan tiykarında  matematika, biologiya, rus tili hám ádebiyatı pánlerinen onlayn  test tapsırǵan bolsa, 6-9-avgust kúnleri «Texnologiya hám awıl xojalıǵın mexanizaciyalaw» qánigeligi boyınsha magistraturaǵa jazba túrde imtixan tapsırdı.

-Bakalavr tálim baǵdarı boyınsha Qubla Ural mámleketlik agrar universitetine test tapsırǵan talabanlarǵa 3 pánnen tayarlanǵan sorawlardı sheshiw ushın 3 saat, magistraturaǵa tapsırǵan talabanlar ushın óz qánigelikleri boyınsha berilgen 4 sorawǵa  jazba túrde juwap jazıwǵa  4 saat múddet  berildi. Filialda shólkemlestirilgen  bul imtixanlardı rossiyalı kásipleslerimiz baqlap bardı,-deydi bizge Tashkent mámleketlik agrar universiteti Nókis filialınıӊ Xalıqaralıq birge islesiw bólimi baslıǵı Bekmurat Abdikairov.-Kelesi háptede usı tapsırılǵan imtixanlardıӊ nátiyjeleri málim boladı. Bizler  imtixan tapsırǵan jaslar arasınan Rossiya universitetlerinde tálim alatuǵın talabanlar jetilisip shıǵatuǵınlıǵına bekkem isenemiz. Sebebi, olarda bilim hám ilim iyelewge degen ıqlas hám inta joqarı.

Adilbay Orazov,

jurnalist.