Qaraqalpaqstan awıl xojalıǵı hám agrotexnologiyalar institutı qabıllaw komissiyası tárepinen 2026/2027-oqıw jılı ushın texnikumlardı ayrıqsha bahalar menen tamamlaǵan pitkeriwshilerdi institutimizdiń bakalavriat tálim baǵdarlarına oqıwǵa qabıllaw maqsetinde sáwbetlesiw ótkeriw baslandı.
Sóylesiw ótkeriw kestesine muwapıq, búgin, 21-avgust kúni, Málimleme-resurs orayınıń májilisler zalında texnikum pitkeriwshilerin bakalavriattıń kúndizgi, keshki hám aralıqtan bilimlendiriw baǵdarlarına sáwbet arqalı qabıllaw processleri bolıp ótpekte. Onda tiyisli mákeme hám shólkemlerden wákiller, qabıllaw komissiyası aǵzaları, professor-oqıtıwshılar qatnaspaqta.
Sáwbetlesiw procesinde pitkeriwshilerdiń tańlaǵan tálim baǵdarı boyınsha tayarlıq dárejesi, kásiplik bilim hám kónlikpeleri bahalanbaqta. Hár bir talaban menen óz aldına sáwbetlesip, olardıń bilim dárejesi hám tańlaǵan tarawına bolǵan qızıǵıwshılıǵı anıqlanbaqta.
Bul process instituttıń ashıq-aydınlıq principleri tiykarında shólkemlestirilgen bolıp, onda barlıq talabanlar ushın teń sharayatlar jaratılǵan. Usı arqalı texnikumlardı tabıslı tamamlaǵan jaslar ózleriniń akademiyalıq jolın joqarı bilimlendiriwde dawam ettiriw imkaniyatına iye boladı.
