JICA wákilleri menen xalıqaralıq birge islesiw hám volontyorlıq baǵdarlamaların rawajlandırıw máseleleri dodalandı

🟢Usı jıldıń 13-oktyabr kúni Qaraqalpaqstan awıl xojalıǵı hám agrotexnologiyalar institutına Yaponiya xalıqaralıq birge islesiw agentliginiń (JICA) Ózbekstandaǵı wákilxanasınıń volontyorlar baǵdarlaması koordinatorları Yamaguchi Koji hám Odilxon Xasanovlar keldi.

🟢Sapar etiw sheńberinde institut rektorı M.Dauletmuratov, prorektor Sh.Akmalovlar menen ushırasıw bolıp ótti. Onda institutta jumıs alıp barıp atırǵan yaponiyalı volontyorlardıń jumıs iskerligi, ilimiy izlenisleri, bilimlendiriw procesindegi qatnası hám instituttıń turmısına beyimlesiwine baylanıslı máseleler dodalandı.

🟢Ushırasıw dawamında jańadan kelgen volontyorlardı tiyisli kafedralarǵa biriktiriw, olardıń ilimiy-izertlew jumısların qollap-quwatlaw, professor-oqıtıwshılar menen birge islesiwin kúsheytiw hám bar ilimiy potencialdan nátiyjeli paydalanıw máselelerine ayrıqsha itibar qaratıldı.

🟢Sonday-aq, keleshekte institutqa jańa yaponiyalı volontyorlardı tartıw, olardıń jumıs baǵdarların instituttıń talaplarınan kelip shıǵıp belgilew hám xalıqaralıq birge islesiwdi jáne de keńeytiw boyınsha pikir alısıldı. Ushırasıw juwmaǵında bul baǵdarlarda birge islesiwdi dawam ettiriw hám belgilengen wazıypalardı ámelge asırıw boyınsha kelisimlerge erisildi.

🟢Bul sapar institutta xalıqaralıq tájiriybeni úgit-násiyatlaw, ilimiy hám bilimlendiriw jumısın rawajlandırıw jáne Ózbekstan hám Yaponiya arasındaǵı bilimlendiriw tarawındaǵı birge islesiwdi bekkemlewde úlken áhmiyetke iye.