Xalıqaralıq birge islesiwde jańa qádem: Artemiya ilimiy-izertlew orayı shólkemlestiriledi
Búgin Urmiya universiteti Artemiya hám akvakultura ilimiy-izertlew institutınıń tiykarın salıwshısı, professor Naser Ag Qaraqalpaqstan awıl xojalıǵı hám agrotexnologiyalar institutında miymanda boldı. Miymandı dáslep institut rektorı M.M. Dauletmuratov kútip aldı. Ushırasıw dawamında tárepler óz-ara pikir alısıp, ilim hám bilimlendiriw tarawlarındaǵı birge islesiw perspektivaları boyınsha sóylesiwler alıp bardı.
Sóylesiw procesinde awıl xojalıǵı, akvakultura, suw biologiyalıq resurslarınan nátiyjeli paydalanıw hám usı baǵdarlarda ilimiy-izertlew jumısların rawajlandırıw sıyaqlı máselelerge ayrıqsha itibar qaratıw imkaniyatları dodalandı.
Sonday-aq, joqarı bilimlendiriw mákemeleri arasında ilimiy baylanıslardı bekkemlew, tájiriybe almasıw, perspektivalı ilimiy joybarlardı ámelge asırıw jáne professor-oqıtıwshılar hám jas izertlewshiler ushın jańa imkaniyatlar jaratıw baǵdarındaǵı birge islesiw baǵdarları boyınsha Irannıń Urmiya universiteti arasında birge islesiw memorandumına qol qoyıldı.
Urmiya universiteti Artemiya hám akvakultura ilimiy-izertlew institutınıń tiykarın salıwshısı, professor Naser Aghtıń qatnasıwındaǵı ushırasıwda bilimlendiriw hám ilim tarawındaǵı birge islesiwdiń ámeliy baǵdarları belgilep alındı.
Memorandum sheńberinde:
Studentler almasıwın jolǵa qoyıw — studentlerge sırt elde bilim alıw hám ilimiy tájiriybe arttırıw imkaniyatların jaratıw;
Qospa ilimiy joybarlardı ámelge asırıw — artemiya, akvakultura hám shor suw basseynlerin úyreniw boyınsha birgelikte izertlewler alıp barıw;
Artemiya ilimiy-izertlew orayın shólkemlestiriw — birge islesiw joybarı sheńberinde ilimiy izleniwler hám ámeliy tájiriybeler ushın oray jaratıw;
Ilimiy tájiriybe almasıw — professor-oqıtıwshılar hám izertlewshilerdiń qatnasıwında seminarlar, ushırasıwlar hám qospa ilajlar shólkemlestiriwge kelisip alındı.
Bul birge islesiw Aralboyı aymaǵınıń tábiyǵıy resursların ilimiy úyreniw, jas izertlewshilerdi qollap-quwatlaw hám xalıqaralıq tájiriybeni ámeliyatqa engiziwge xızmet etedi.
