Jańa oqıw jılında – keń kólemli wazıypalar: Qaraqalpaqstan awıl xojalıǵı hám agrotexnologiya institutı professor -oqıtıwshıları jıynalısı bolıp ótti.

Jańa 2022/2023 oqıw jılında instituttıń ilimiy-bilimlendiriw hám xalıqaralıq iskerliginde qanday jetiskenliklerge erisilgeni haqqında jaqın keleshekte hal etiliwi kerek bolǵan tiykarǵı wazıypalar – sol hám basqa máseleler 2022-jıl 31-avgust kúni Qaraqalpaqstan awıl xojalıǵı hám agrotexnologiyalar institutında bolıp ótken professor -oqıtıwshıları jıynalısında talqılandı. Ushırasıwdı institut rektori a.x.i.d. prof. E. Sh. Toreniyazov baslap berdi. Jańa oqıw jılınıń baslanıwı menen kásipleslerin qutlıqlap , bıyılǵı jıl barlıq oqıtıwshı hám studentler ushın ilim hám tálim jetiskenlikleri, kásiplik hám jeke jeńisler jılı bolıwın tiledi.
Bunnan tısqarı, tálim hám pán sistemasın rawajlandırıw hám jetilistiriwde aktiv qatnasıp atırǵan, institut rawajlanıwına úlken jeke úles qosqan institut professor –oqıtıwshıların hám studentlerdi xoshametlew maqsetinde diplom, kókrek nıshanı hám medallar tapsırıldı. “Ózbekiston mustakilligining 31 yilligi” ǵárezsizligimizdiń 31 jılına baǵıshlanǵan prof. Auezov O. hám prof. Sаbirov G kókrek nıshanı menen sıylıqlandı. Dotsent ilimiy ataǵı alǵanı menen dotsent Seilbekov B. hám dotsent Aliyeva G. qutlıqlandı. Dawletmuratov M. “Umid uchkuni” kókrek nıshanı menen sıylıqlandı. Student qızımız Arzibayeva A. “Biologiya pánleri áleminde” xalıqaralıq tańlawında biologiya páninen jeńimpaz diplom hám medal menen sıylıqlandı.Sonıń menen birge, jeńimpazdı tayarlaģanı ushın pán doktorı Jollıbekov B. diplom hám medal menen sıylıqlandı. Xalıqaralıq tańlaw hám olimpiada da qatnasqan studentler Joldasbayeva J. hám Tilepov D. diplom menen sıylıqlandı. Joqarı maman qánigeler tayarlaw, oqıw processine jańa texnologiya hám oqıtıw usılların engiziw, ilimiy izertlewlerdi rawajlandırıw, kóp jıllıq miyneti ushın húrmet jarlıģı hám alǵısnamalar menen professor –oqıtıwshılar Nawrezov T., dots. Aytbaev K, prof. Shamuratova N., Karimullaeva M. sıylıqlandı.
Jiynalıs dawamında jaslar menen islesiw hám aǵartıwshılıq isleri boyınsha birinshi prorektor R. Ibragimova, oqıw isleri boyınsha prorektor dots. Absattarov N., Ilimiy isleri hám innovaciya boyınsha prorektor a.x.i.d-r. Jollibekov B. universitettiń ótken oqıw jılındaǵı tiykarǵı nátiyjeleri hám jetiskenliklerine toqtalıp, jańa 2022/2023 oqıw jılı ushın jobalar haqqında sóz ayttı. Prorektorlar ótken jıl dawamında fakultet hám kafedralar, oqıtıwshı hám ilimpazlardıń tiykarǵı waziypası – sapalı tálim alıw, nátiyjeli ilimiy izertlewler aparıw, qolay miynet sharayatların jaratıwda kómeklesti. Keleside ámeldegi ilimiy-innovciyalıq strukturalardı bekkemlew, olardıń óz-ara baylanısıwı hám iskerligi natiyjesin asırıw ilajları kórildi, baspa iskerligi reytingin asırıw siyasatı alıp barıldı. Ótken oqıw jılında instituttıń xalıqaralıq baylanısları kóplegen tarawlarda keńeyip hám bekkemlendi. Student jaslardı tárbiyalaw boyınsha, jáne social islerdiń áhmiyeti, institutta qánigeler tayarlawdıń pútkil processi menen tıǵız baylanıslılıǵı bólek aytılıp ótildi. Sonıń menen birge, ushırasıw dawamında institutımızģa profilaktika inspektorı leytenant Kenesbayev T. biriktirgenligi menen tanıstırıldı. Rektor E. Sh. Toreniyazov aytıp ótkenindey, “Jańa oqıw jılında institut jáne onıń professor -oqıtıwshıları aldında keń kólemli wazıypalar turıptı. Olardı sheshiw, maksimal nátiyjelerge erisiw ushın anıq islew intizamın talap etedi. Ushırasıw sońında institut rektorı institut jāmāātin Ózbekstan Ǵárezsizliginiń 31 jıllıǵı menen qutlıqladı! Hāmmege den-sawlıq, jumıslarımızda tabıslar, shańaraqta tınıshlıq, tatıwlıq hám párawanlıq tiledi.