Ózbekstan qaharmanları – xalqımızǵa belgili lirik shayır I.Yusupovtıń, qaraqalpaq prozasınıń bayteregi Tólepbergen Qayıpbergenovtıń tuwılǵanına bıyıl 95 jıl tolmaqta. Usı múnásibet penen búgin institutımızda «Tiller» kafedrası hám talaba jaslar tárepinen saz-sáwbetli ádebiy keshe ótkerildi. Kesheni kafedra baslıǵı Sh.Kunnazarova ashtı hám alıp bardı. Kiris sózdi institut birinshi prorektorı R.Ibragimova sóylep, ol sóz sheberleriniń ómiri hám dóretiwshiligine qısqasha toqtap, hár bir talaba olardıń shıǵarmalarınan úlgi alıwı kerekligin atap ótti. Keshede Berdaq atındaǵı Qaraqalpaq mámleketlik universiteti «Qaraqalpaq ádebiyatı» kafedrası docenti wazıypasın atqarıwshı, filologiya ilimleri boyınsha filosofiya doktorı Zuxra Allamuratova miymanda boldı. Ol ádebiyatımızdıń qos bayterekleriniń dóretiwshilik jolı, jazıw stili, shıǵarmalarınıń mazmunına keń túrde toqtap, keshe qatnasıwshılarına qızıqlı maǵlıwmatlar berdi. Keshe saz-sáwbetli dástúrler menen dawam etti.