Qıtay Xalıq Respublikasında “Shólleniwge qarsı gúresiw hám kóklemzarlastırıwdı rawajlandırıw” atamasında xalıqaralıq simpozium bolıp ótti. Bul abıraylı ánjumanda dúnyanıń hár qıylı mámleketlerinen ilimpazlar, ekspertler hám qánigeler óz tájiriybesi hám ilimiy izlenisleri menen qatnastı.

 Bul simpoziumda  institutımız rektorı B.B.Jollıbekov ta qatnastı. Ol óz bayanatında Ózbekstan, atap aytqanda, Qaraqalpaqstannıń topıraq-ıqlım sharayatları, shorlanıw hám degradaciyaǵa ushıraǵan jerlerdi kóklemzarlastırıw baǵdarındaǵı mashqalalar jáne de Aral teńizi qurıǵan ultanında ámelge asırılıp atırǵan jumıslar haqqında tolıq maǵlıwmat berdi.

 Sonday-aq, rektor bul baǵdarda dúnyada alıp barılıp atırǵan ilimiy izlenisler hám tájiriybeler haqqında xalıqaralıq sherikler menen pikir alıstı. Ilaj dawamında Qıtay, Yaponiya hám Koreya qánigeleri shólleniwdiń aldın alıw boyınsha óz jetiskenlikleri menen bólisip, úshinshi mámleketler menen tájiriybe almasıw imkaniyatı da jaratıldı.

 Xalıqaralıq simpozium Ózbekstan ilimpazları ushın da ilimiy birge islesiwdi keńeytiw, tájiriybe almasıw hám ekologiyalıq mashqalalardı sheshiwde jańa qatnaslardı engiziw ushın áhmiyetli maydan bolıp xızmet etti.