Qaraqalpaqstan awıl xojalıǵı hám agrotexnologiyalar institutında Yaponiyanıń Ózbekstandaǵı wákilxanasınıń sawda bóliminiń menedjeri CHINORI TOKITA hám Yaponiyanıń Osaka shólkemi Sawda bóliminiń juwaplı xızmetkeri Shunkar Shomurodovlar xızmet saparı menen miyman boldı.

 Miymanlardı institut rektorı B.Jollibekov hám Xalıqaralıq baylanıslar bólimi baslıǵı E.Abdullaev kútip alıp, óz-ara ushırasıw shólkemlestirildi. Ushırasıw dawamında miymanlar Ózbekstanda jetistirilgen paxta shiyki zatınan Yaponiyada derlik on jıldan aslam waqıt dawamında tayar ónimler islep shıǵarılıp atırǵanı haqqında maǵlıwmat berdi. Sonday-aq, olar awıl xojalıǵı tarawındaǵı bar mashqalalardı sheshiw maqsetinde institut penen birgelikte ilimiy izertlewler alıp barıw usınısın bildirdi.

 Institut basshıları óz gezeginde usı baǵdardaǵı joybarlar ushın zárúr ilimiy potencial hám tájiriybe bar ekenligin atap ótti. Ushırasıw juwmaǵında tárepler keleshekte óz-ara birge islesiw memorandumına qol qoyıw hám birgelikte ilimiy-ámeliy joybarlardı ámelge asırıw boyınsha kelisimge eristi.

 Bunnan soń, miymanlar Xalıqaralıq baylanıslar bólimi baslıǵı E.Abdullaev basshılıǵında instituttıń dala tájiriybe maydanına bardı. Ol jerde “Diyqanshılıq, awıl xojalıǵı eginleriniń selekciyası hám tuqımgershiligi” kafedrası docenti Xudoyor Matyoqubov tárepinen alıp barılıp atırǵan ilimiy-izertlew jumısları menen tanısıp, óz-ara pikir alıstı hám keleshekte birge islesiwdi jáne de bekkemlewge kelisip aldı.