Yaponiyanıń Ózbekstan Respublikasındaǵı elshixanasınıń ekinshi xatkeri Uno Kimi hám Qaraqalpaqstan Respublikası Ministrler Keńesiniń Sırtqı biyǵárez járdem qarjıların (grantlar) tartıw hám donorlar menen islesiw bóliminiń baslıǵı Idirisov Kamalatdin, sonday-aq, Birlesken Milletler Shólkemi wákilleri institutımızda miyman boldı.

 Dáslep miymanlar hám institutımız rektorı B.Jollibekovtıń qatnasıwında ushırasıw shólkemlestirildi. Ushırasıwda institutımız rektorı B.Jollibekov búgingi kúnde Aralboyı topıraǵınıń klimat sharayatın jaqsılaw, degradaciyaǵa ushıraǵan, qurǵaq hám shorlanǵan jerlerdi qayta egislik maydanlarǵa ótkeriw baǵdarında ámelge asırılıp atırǵan joybarlar, olardıń házirgi kúndegi barısı hám institutimizdiń xalıqaralıq baylanısları haqqında maǵlıwmat berdi.

 Bunnan soń Yaponiyanıń Ózbekstan Respublikasındaǵı elshixanasınıń ekinshi xatkeri Uno Kimi bul jumıslar, sonday-aq, Yaponiya shólkemleri menen birgelikte ámelge asırılıp atırǵan joybarlar hám yaponiyalı volontyorlar ushın jaratılǵan imkaniyatlardan minnetdar ekenligin bildirdi.

Ushırasıw dawamında miymanlarǵa institutımız laboratoriyaları hám ol jerdegi ilimiy izertlewler keńnen tanıstırıldı.

 Ushırasıwdan tiykarǵı maqset Yaponiya hám institut arasında ámelge asırılıp atırǵan joybarlardıń nátiyjelerin úyreniw hám bahalawdan ibarat boldı.