2026-jılı 20-fevral kúni Qaraqalpaqtan awıl xojalıǵı hám agrotexnologiyaları institutında “Ózbekstan keńpeyil úlke” atamasında milletleraralıq tatıwlıqqa baǵıshlanǵan ilaj bolıp ótti.

Bul ushırasıw Ózbekstan Respublikası Prezidenti Administraciyasınıń basshısı tárepinen Qaraqalpaqstan Respublikası jaslarına baylanıslı reformalardıń nátiyjeliligin arttırıw, olardıń qızıǵıwshılıqların hám tileklerin júzege shıǵarıw boyınsha jańa baslamalar, innovaciyalıq ideyalardı óz ishine alǵan kompleksli ilajlar baǵdarlamasınıń 75-bántinde Jaslardı watansúyiwshilik hám keńpeyillik ruwxında tárbiyalaw maqsetinde ótkerildi.

Ilajǵa Qaraqalpaqstandaǵı Ruwxıylıq hám aǵartıwshılıq orayınıń qánigeleri, shayırlar, Jaslar agentliginiń wákilleri, Slavutich Ukraina milliy mádeniy orayınıń QR bólimi, Túrkmen milliy mádeniy orayınıń xızmetkerleri, sonday-aq, instituttaǵı Yaponiyanıń dúnya reytinglerindegi top 300 joqarı oqıw orınlarınıń qatarına kiretuǵın Tokio awıl xojalıǵı hám agrotexnologiyalar universiteti jáne Chiba universitetiniń studentleri Auayama Yuna hám Nagaiy Marinler qatnastı.

Ushırasıw dawamında taraw qánigeleri hám hár qıylı millet wákilleri student-jaslarǵa kóp milletli xalqımızda tınıshlıqtıń qádirine jetiw, insanıylıq pazıyletlerdi óz sanasında rawajlandırıw, milletleraralıq tatıwlıq hám diniy keńpeyillik arqalı watanımızdıń rawajlanıwına úles qosıw boyınsha úgit-násiyat jumısları alıp barıldı.

Instituttıń «Gumanitar pánler hám tiller» kafedrası assistenti A.Seyfullaev óziniń «Ózbekstan – bawrıkeń úlke» temasındaǵı bayanatı menen qatnastı. Onda Ullı muhaddis babamız Imam Buxariy aytqanınday “Barlıq iygilikli ámeller niyetke baylanıslı” degende áyne haqıyqattı aytıp búgingi muqaddes ramazan ayında elimizde jasawshı barlıq shaxs hám puqaralar mine usı úgitke ámel etip qayırlı, sawaplı, iygilikli islerge qol ursa álbette ómiri jaqsılıqqa tolı boladı.

Ózbekstan – ázelden túrli millet hám din wákilleri tınısh-tatıw jasap kelgen bawrıkeń úlke. Bul elde ásirler dawamında qáliplesken bawrıkeńlik dástúrleri búgingi kúnde de óz áhmiyetin joǵaltpaǵan. Rásmiy maǵlıwmatlarǵa kóre, Ózbekstanda 130 dan artıq millet hám elat, sonnan, 16 diniy konfessiya wákilleri jasaydı. Hátteki Ózbekstan Respublikası Prezidenti Sh.Mirziyoyev 2017 jıl BMSH Bas Assambleyasınıń 72-sessiyasında dúnya jámiyetshiligine «Aǵartıwshılıq hám diniy bawrıkeńlik» haqqında rezolyuсiyanı qabıl etiw kerekligi usınısın bildiredi. Bul rezolyuсiya aradan bir waqıt ótip qabıl etilgeni haqqında maǵlıwmatlardı aytıp ótti.

Ushırasıw dawamında student-jaslar hám professor-oqıtıwshılar ózlerin qızıqtırǵan sorawlarına jeterli dárejede juwaplar aldı.

Bunday ushırasıwlar jaslarǵa awızbirshilik hám doslıq qádiriyatların úyretedi. Olar túrli millet hám dinge tiyisli bolǵan jámiyette birge islesiw hám mashqalalardı tınısh jol menen sheshiwdi úyrenedi. Sonıń menen birge, jaslar ruwxıy, sociallıq hám intellektuallıq potencialın rawajlandırıp, keleshekte turaqlı hám keńpeyil jámiyetti qurıwǵa tayar boladı.