Qaraqalpaqstan awıl xojalıǵı hám agrotexnologiyalar institutınıń Agrotexnologiya hám toǵayshılıq fakultetinde ata-analar qatnasıwında áhmiyetli májilis shólkemlestirildi. Bul ushırasıw studentlerdiń oqıw procesinde belsendiligin arttırıw, olardıń oqıwdaǵı jetiskenlikleri hám mashqalaların ata-analar menen birgelikte dodalaw maqsetinde ótkerildi
Ushırasıw dawamında studentlerdiń pánlerden kredit qarızdarlıǵı, oqıw procesinde tártibi hám juwapkershiligi ayrıqsha dodalandı. Sonday-aq, kontrakt tólemlerin belgilengen múddetlerde ámelge asırıwdıń áhmiyeti, óndirislik ámeliyatlarda belsene qatnasıw zárúrligi hám bul arqalı kásiplik kónlikpelerdi bekkemlew máselelerine itibar qaratıldı.
Bunnan tısqarı, májiliste qábiletli studentler ushın sırt mámleketlerde magistratura basqıshında bilim alıw imkaniyatları, xalıqaralıq birge islesiw baǵdarlamaları hám grantlar haqqında da tolıq maǵlıwmat berildi. Ata-analar ózlerin qızıqtırǵan sorawlar menen múrájat etip, qánigelerden tiyisli juwaplar aldı.
Májilis ashıqtan-ashıq sóylesiw hám óz-ara birge islesiw ruwxında ótip, bilimlendiriwdiń sapasın bunnan bılay da arttırıw, studentlerdiń keleshektegi jetiskenligine tiykar jaratıwda ata-analar, ustazlar hám juwapkerler arasındaǵı birge islesiw áhmiyetli ekeni jáne bir márte atap ótildi.
