Magistrantlardıń ilimiy tájiriybeleri aprobaciyadan ótkerildi
Qaraqalpaqstan awıl xojalıǵı hám agrotexnologiyalar institutı Agrotexnologiya hám toǵayshılıq fakultetiniń “Diyqanshılıq, awıl xojalıǵı eginleriniń selekciyası hám tuqımgershiligi” kafedrası tárepinen magistrantlardıń ilimiy-izertlew jumısların úyreniw hám olardıń tájiriybe nátiyjelerin bahalaw maqsetinde aprobaciya ilajı shólkemlestirildi.
Aprobatsiya kafedra baslıǵı, biologiya ilimleri kandidatı T.Allambergenov basshılıǵında ótkerildi. Onda kafedra professor-oqıtıwshıları tárepinen “Selekciya hám tuqımgershilik,” “Agronomiya” hám “Organikalıq diyqanshılıq hám azıq-awqat qáwipsizligi” qánigeliklerinde bilim alıp atırǵan magistrantlardıń ilimiy tájiriybeleri aprobaciyadan ótkerildi.
Ilaj dawamında instituttıń tájiriybe maydanlarında alıp barılıp atırǵan ilimiy-izertlew jumısları kózden ótkerildi, aprobaciya processlerin shólkemlestiriw tártibi boyınsha ámeliy usınıslar berildi. Sonday-aq, awıl xojalıǵında úlken áhmietke ie bolǵan paxta, gúnji, qawın hám biyday eginleriniń tuqımgershiligi sistemasın ilimiy tiykarda shólkemlestiriw, sortlardıń tazalıǵı hám zúráátliligin támiyinlew máseleleri boyınsha magistrantlarǵa tolıq túsinikler berildi.
Bul aprobaciya magistrantlardıń ilimiy izleniwlerin jetilistiriw, tájiriybe jumıslarınıń sapasın arttırıw hám teoriyalıq bilimlerdi ámeliyat penen úylestiriwde úlken áhmietke ie boldı.
