Qaraqalpaqstan awıl xojalıǵı hám agrotexnologiyalar institutında “Rektor hám jaslar” ushırasıwı bolıp ótti
Usı jıldıń 4-noyabr kúni Qaraqalpaqstan awıl xojalıǵı hám agrotexnologiyalar institutında “Rektor hám jaslar” ushırasıwı bolıp ótti. Ushırasıwda Qaraqalpaqstan awıl xojalıǵı hám agrotexnologiyalar institutınıń rektorı M.M. Dauletmuratov, Jaslar máseleleri hám ruwxıy-aǵartıwshılıq isleri boyınsha birinshi prorektorı D.Qurbaniyazov hám oqıw isleri boyınsha prorektorı T.Nawrizov, institut jámááti, studentler hám ǵalaba xabar qurallarınıń wákilleri qatnastı.
Dáslep, ashıq sáwbet túrinde bolıp ótken ushırasıwda institut rektorı M.M. Dauletmuratov shıǵıp sóylep: studentlik dáwiri insan ómirindegi eń áhmiyetli hám juwapkershilikli basqıshlardan biri ekenligin atap ótip, bul dáwirde bilim hám kásiplik kónlikpelerdi turaqlı jetilistiriw, zamanagóy bilimlerdi iyelew jáne institutta jaratılǵan imkaniyatlardan nátiyjeli paydalanıw zárúrligine ayrıqsha itibar qarattı. Sonday-aq, institutta studentlerdiń sapalı bilim alıwı, kásiplik tayarlıǵın arttırıwı, ilimiy izleniwler alıp barıwı, talant hám qábiletlerin kórsetiwi ushın jaratılǵan sharayatlar haqqında tolıq maǵlıwmat berdi. Jaslardı belsendi, intaker hám izleniwsheń bolıwǵa, keleshekte óz kásibiniń jetik qánigesi sıpatında qáliplesiwge shaqırdı.
Bunnan soń, Jaslar máseleleri hám ruwxıy-aǵartıwshılıq isleri boyınsha birinshi prorektor D.Qurbaniyazov hám oqıw isleri boyınsha prorektor T.Nawrizovlar shıǵıp sóylep, studentlerdiń bilimlendiriw procesindegi belsendiligi, ishki tártip-qaǵıydalarǵa ámel etiwi, sabaqlarda turaqlı qatnasıwı hám instituttıń jámiyetlik hám ruwxıy-aǵartıwshılıq turmısında belsendi bolıwı boyınsha óz pikir-usınısların bildirdi. Ushırasıw dawamında studentlerdiń bilim alıwı, bos waqtın mazmunlı shólkemlestiriwi, sport, mádeniyat hám ilim baǵdarlarındaǵı imkaniyatlardan paydalanıwı, sonday-aq, jaslar ushın ámelge asırılıp atırǵan reformalar hám baslamalardıń áhmiyeti haqqında da sóz etildi.
Sonday-aq, Innovaciyalıq rawajlanıw boyınsha qánigesi T.Polatbaev hám Nókis jaslar texnoparki qánigesi E.Kereevler shıǵıp sóylep, studentlerge innovaciyalıq ideyalar, startap joybarlar hám zamanagóy texnologiyalardı rawajlandırıw baǵdarında ámelge asırılıp atırǵan jumıslar haqqında tolıq maǵlıwmat berdi.
Olar ózleriniń prezentaciyaları menen qatnasıp, búgingi kúnde jaslardıń ilimiy potencialı, dóretiwshilik pikirlewi hám innovaciyalıq baslamaların qollap-quwatlaw ayrıqsha áhmiyetke iye ekenin atap ótti. Sonday-aq, studentlerge óz ideya hám joybarların ámeliyatqa engiziwi, startap joybarlarda qatnasıwı hám Nókis jaslar texnoparki tárepinen usınıs etilip atırǵan imkaniyatlardan nátiyjeli paydalanıwı boyınsha túsinikler berildi.
Ushırasıw dawamında jaslardı jańalıq jaratıwǵa, zamanagóy bilim hám texnologiyalardı puqta iyelewge, óz ústinde turaqlı islewge jáne keleshekte mámleketimizdiń rawajlanıwına xızmet etetuǵın innovaciyalıq joybarlardı islep shıǵıwǵa shaqırıw zárúrligi ayrıqsha atap ótildi.
