Ózbekstan Respublikası Prezidentiniń 2026-jıl 29-sentyabrdegi «Joqarı bilimlendiriwde dual bilim beriw formasında kadrlar tayarlaw sistemasın jetilistiriw ilajları haqqında»ǵı PF-209-sanlı Pármanı hám Qaraqalpaqstan awıl xojalıǵı hám agrotexnologiyalar institutı rektorınıń 2026-jıl 2-noyabrdegi 17-13/122-sanlı buyrıǵı atqarılıwın támiyinlew maqsetinde áhmiyetli ámeliy ilajlar shólkemlestirildi.
Usı múnásibet penen joqarı bilimlendiriw mekemesi menen óndiris kárxanaları arasındaǵı birge islesiw baylanısların bekkemlew, dual tálim beriw sisteması tiykarında kadrlar tayarlaw hám studentlerdiń ámeliy kónlikpelerin arttırıw maqsetinde «Agroinjeneriya hám innovaciyalıq texnologiyalar» kafedrası hám Awıl xojalıǵı texnikası hám texnologiyaların sertifikatlaw hám sınaw orayı arasındaǵı óz ara birge islesiw haqqındaǵı shártnama sheńberinde ashıq sáwbetlesiw hám sheberlik sabaqları ótkerildi.
Ilajdı Agroinjeneriya hám ekonomika fakulteti dekanı, p.i.d., professor E. Sultanov kiris sózi menen ashıp berdi. Dekan óz sózinde elimizde dual bilim beriw sistemasın engiziw boyınsha ámelge asırılıp atırǵan reformalar, Prezident Pármanı hám institut buyrıǵınıń mazmun-mánisi haqqında aytıp ótti. Sonday-aq, miymanǵa saparı ushın minnetdarshılıq bildirdi hám onı studentler hám professor-oqıtıwshılarǵa tanıstırdı.
Usı ámeliy sapar sheńberinde usı jıldıń 5–7-noyabr kúnleri institutqa Awıl xojalıǵı texnikası hám texnologiyaların sertifikatlaw hám sınaw orayı direktorınıń birinshi orınbasarı – bas injeneri, t.i.d., professor Tolibayev Alpisbay Yerjanbayevich sapar menen keldi.
Úsh kúnlik baǵdarlama sheńberinde «Awıl xojalıǵın mexanizaciyalastırıw» tálim baǵdarında tálim alıp atırǵan studentler hám professor-oqıtıwshılar ushın tómendegi ilajlar shólkemlestirildi:
– Dual bilim beriw talaplarına sáykes ámeliy shınıǵıwlar: Teoriyalıq bilimler menen islep shıǵarıw proceslerin birgelikte alıp barıwǵa qaratılǵan ashıq sabaqlar hám sheberlik sabaqları (master-klasslar);
– Ilimiy-ámeliy seminar: Zamanagóy awıl xojalıǵı texnikaların sertifikatlaw, sınawdan ótkeriw hám olardıń sapalıq kórsetkishlerin bahalaw boyınsha ámeliy túsinikler beriw;
– Islep shıǵarıw ámeliyatı hám «CareerEdu» platforması: Dual bilim beriw sisteması tiykarında studentlerdi kárxanalarda 6 ayǵa shekemgi múddette teoriyalıq bilim alıwdan ajıralǵan halda yamasa «4+2», «5+1», «3+3» kesteleri tiykarında ámeliyat ótkeriw, sonday-aq, olarǵa biriktirilgen juwapker birinshi qadaǵalawshı qánigelerdiń jumısın shólkemlestiriw máselesi hár tárepleme dodalandı.
Quwanıshlısı, ushırasıw hám sheberlik sabaqları dawamında oray direktorınıń birinshi orınbasarı A. Tolibayev joqarı bilimge hám ámeliy jumısqa umtılısı kúshli bolǵan 3–4 qábiliyetli studentlerdi dual tálim beriw sisteması tiykarında tikkeley ózi basshılıq etip atırǵan orayǵa jumısqa qabıllaw hám olarǵa ámeliyat dáwiriniń ózinde jumıs orınların ajıratıw boyınsha óz usınısın bildirdi. Bul baslama studentler ushın teoriyalıq bilimlerin tikkeley óndiris sharayatında bekkemlewge hám keleshekte tayar qánige sıpatında jumıs penen támiyinleniwge úlken múmkinshilik jaratadı.
Shólkemlestirilgen bul ilajlar studentlerdiń zamanagóy texnika hám texnologiyalar boyınsha tereń ámeliy bilim hám kónlikpelerin qáliplestiriwge, ilimiy izertlew jumısların rawajlandırıwǵa, sonday-aq, joqarı bilimlendiriw mákemeleri menen islep shıǵarıw tarawı arasındaǵı integraciyanı jańa basqıshqa alıp shıǵıwǵa xızmet etedi.
