Agroinjenering hám ekonomika fakulteti studentlerine Prezident qararı hám “Keleshekke qádem” baǵdarlaması boyınsha túsinik jumısları alıp barıldı
Qaraqalpaqstan awıl xojalıǵı hám agrotexnologiyalar institutınıń “Agroinjenering hám ekonomika” fakultetinde Institut Registrator ofisi baslıǵı D.B.Ramazanov tárepinen student-jaslardı isbilermenlik jumısına keńnen tartıw hám bántligin támiyinlew maqsetinde Ózbekstan Respublikası Prezidentiniń 210-sanlı qararı hám “Keleshekke qádem” baǵdarlamasınıń mazmun-mánisi boyınsha úgit-násiyat jumısları shólkemlestirildi.
Ilaj dawamında studentlerge Prezident qararında belgilengen tiykarǵı wazıypalar, jaslardı qollap-quwatlaw, olardıń baslama hám ideyaların júzege shıǵarıw, isbilermenlik jumısın rawajlandırıw hám qarjı imkaniyatlarınan nátiyjeli paydalanıw máseleleri haqqında tolıq maǵlıwmat berildi.
Sonday-aq, “Keleshekke qádem” baǵdarlamasınıń tiykarǵı maqseti hám baǵdarları, baǵdarlama sheńberinde studentlerge jaratılıp atırǵan imkaniyatlar, óz biznes joybarların islep shıǵıw, startap baslamaların ámelge asırıw, isbilermenlik jumısın jolǵa qoyıw hám finanslıq qollap-quwatlaw mexanizmleri túsindirildi.


