Institutımızda Nawrız bayramına arnalǵan teatrlastırılǵan koncert baǵdarlaması bolıp ótti

Institutımızda Nawrız bayramına arnalǵan teatrlastırılǵan koncert baǵdarlaması bolıp ótti

Búgin, 24-mart kúni Qaraqalpaqstan awıl xojalıǵı hám agrotexnologiyalar institutında Nawrız ulıwma xalıqlıq bayramına baǵıshlanǵan «Hár kúniń Nawrız bolsın, janajan Ózbekstanım!» atamasındaǵı bayram seyili hám teatrlastırılǵan muzıkalı-xoreografiyalıq koncert baǵdarlaması shólkemlestirildi.

Bayram múnásibeti menen institut studentleriniń qol óneri úlgileri, qaraqalpaq milliy buyımları, milliy taǵamları, saz ásbapları kórgizbesi jiynalǵanlar diqqatına usınıldı.
Ilajǵa Qaraqalpaqstan Respublikası Joqarǵı Keńesiniń komitet baslıǵı D.Qurbaniyazov qatnasıp, bayram qatnasıwshıların hám miymanlardı shıǵıs xalıqlarınıń jańa jıl bası – Nawrız bayramı menen qutlıqladı .

Mámleketimizde joqarı bilimlendiriwge qaratılip atırǵan itibar, jaslardıń bilimli, hár tárepleme jetik qániygeler bolıp jetilisiwi ushın jaratılip atırǵan imkaniyatlarǵa toqtalıp ótti. Sonday-aq, awıl xojalıǵı tarawında maman qániygelerdiń jetilisiwinde Qaraqalpaqstan awıl xojalıǵı hám agrotexnologiyalar institutınıń ornın hám onıń jetiskenliklerin ayrıqsha atap ótti.
Onnan soń Qaraqalpaqstan awıl xojalıǵı hám agrotexnologiyalar institutı rektorı, awıl xojalıǵı ilimleri doktorı, professor E.Sh.Tóreniyazov sózge shıǵıp, bársheni ulıstıń ullı kúni menen qutlıqladı hám jaqsı tileklerin bildirdi.

Ilajǵa Qaraqalpaqstanǵa miyneti sińgen mádeniyat xızmetkeri A.Ótepbergenov, Qaraqalpaqstan xalıq artisti B.Ótepbergenovalar qatnastı hám jiynalǵanlarǵa dóretiwshilik miynatlerin usındı.

Teatrlastırılǵan koncert baǵdarlamasında balalar atqarıwındaǵı ayaq oyın, milliy úrp-ádet dástúrlerimiz: qız uzatıw, bet ashar, milliy oyınlardan arqan tartısıw, tas kóteriw oyınları shólkemlestirildi, sonday-aq, student jaslar tárepinen túrli milletlerdiń milliy qosıqları atqarıldı.
Bayram ilajı bárshege kóterińki keypiyat, ózgeshe zawıq inam etti.

Hár kúnimiz Nawrız bolsın!