Qaraqalpaqstan awıl xojalıǵı hám agrotexnologiyalar institutında Germaniyanıń “SES” xalıqaralıq shólkeminiń eksperti Renald Barlenttiń qatnasıwında “Startaplar hám jańa biznes baslamaların qollap-quwatlaw, innovaciyalar, marketing hám xalıqaralıq tájiriybe” atamasında oqıw-seminarı shólkemlestirildi.

 Seminarda Germaniya tájiriybesi tiykarında startaplardı mámleket tárepinen qollap-quwatlaw sisteması, innovaciyalıq ideyalardı ámeliyatqa engiziw, zamanagóy marketing strategiyalarınan nátiyjeli paydalanıw hám xalıqaralıq tájiriybelerdi úyreniw máseleleri dodalandı.

 Sonday-aq, Ózbekstan Sawda-sanaat palatası Qaraqalpaqstan Respublikası basqarmasınıń wákili H.Yusupova startaplardı finanslıq qollap-quwatlaw, grant baǵdarlamaları hám “Keleshekke qádem” baǵdarlaması sheńberinde jaslardıń biznes ideyaların rawajlandırıw imkaniyatları haqqında maǵlıwmat berdi.

 Seminar dawamında studentler innovaciyalıq pikirlew, biznes reje dúziw, investorlar menen nátiyjeli qarım-qatnas júrgiziw boyınsha ámeliy bilim hám tájiriybeler menen tanıstı. Ilaj jaslardıń startap jumısın rawajlandırıw hám olardı isbilermenlikke baǵdarlawda ayrıqsha áhmietke iye boldı.