Húrmetli professor-oqıtıwshılar, áziz student-jaslar hám institut jámááti!

“Kóksaray” rezidenciyasında Prezidentimiz Shavkat Mirziyoevtiń basshılıǵında 24-fevral kúni jaslar menen bolıp ótken ashıqtan-ashıq sóylesiw, bildirilgen pikir-usınıslar, alǵa qoyılǵan ideya hám baslamalar Jańa Ózbekstanda jaslar ushın jaratılǵan sharayatlar hám itibardıń joqarı úlgisi boldı. Búgingi kúnde jaslar mámlekettiń rawajlanıwı hám elimizdiń tayanıshı sıpatında qaralqp, joqarı isenim bildirilmekte. Jaslarımız da óz bilimleri, kúsh-ǵayratı, úmit hám umtılısları menen ózlerin kórsetip, eń joqarı sheklerdi ielewge uqıplı ekenligin dálillemekte.

Húrmetli Prezidentimizdiń jaslar menen jeke ushırasıp, ashıqtan-ashıq sóylesiwi Jańa Ózbekstanda ámelge asırılıp atırǵan jaslarǵa baylanıslı siyasattıń eń jarqın hám umıtılmas waqıyası bolıp esaplanadı. Búgingi kúnde mámleketimiz xalqınıń kópshilik bólegin jaslar quraydı. Mámleketimiz basshısı ushqrasqw paytqnda bunı ayrıqsha atap ótip, “Elimizdegi 22 millionnan aslam jaslarımız tımsalında biz oǵada úlken sociallıq, ekonomikalıq hám siyasiy kúshti kóremiz” dedi.

Búgingi kúnde jaslarımız qolǵa kirgizip atırǵan tabıslar, erisip atırǵan jańadan-jańa shqńlar da, oǵan tiykar bolıp atırǵan imkaniyatlar kólemi de barǵan sayın artıp barmaqta. Mámleketimizde jaratılǵan keń imkániyatlar nátiyjesinde sońǵı jılları jaslarımız dúnya júzlik pán olimpiadalarında 66 altın, 147 gúmis, 221 bronza medalların qolǵa kirgizdi. Ushırasıwda atap ótilgenindey, hár jılı miynet bazarına 600 mıń jas kirip kelmekte. 2030-jılǵa barıp bul kórsetkish 1 millionǵa jetedi. Bul, óz gezeginde, olardı óz qızıǵıwshılıǵı hám imkániyatına sáykes tálim-tárbiya beriw, kásip-ónerge úyretiw hám jumıs penen támiyinlew eń tiykarǵı wazıypa ekenin ańlatadı.

Ushırasıw dawamında mámleketimiz basshısı tárepinen jaslardı qollap-quwatlaw baǵdarında alǵa qoyılǵan 32 áhmiyetli baslaması biz, joqarı bilimlendiriw tarawı wákilleri ushın áhmiyetli wazıypa bolıp esaplanadı. Bul baslamalardıń orınlanıwın támiyinlew ushın barlıq zárúr ilajlardı kóriw joqarı bilimlendiriw tarawında jumıs alıp barıp atırǵan barlıq juwapker xızmetkerlerdiń minneti bolıp esaplanadı. Ásirese, joqarı bilimlendiriw mákemeleri bul tiykarǵı wazıypalardıń orınlanıwın támiyinlewde belsendilik kórsetip, miynet bazarınıń talaplarına sáykes, básekige shıdamlı hám joqarı mamanlıqtaǵı kadrlar tayarlaw arqalı jaslardıń bántligin támiyinlewge múnásip úles qosıwı zárúr. Sebebi, joqarı bilimlendiriw sistemasınıń nátiyjeliligi mámlekettiń turaqlı rawajlanıwın hám ekonomikalıq rawajlanıwın támiyinlewshi áhmiyetli faktorlardıń biri bolıp esaplanadı.

Awıl xojalıǵı tarawı búgingi kúnde azıq-awqat qáwipsizligin támiyinlew, sanaat tarmaqları ushın zárúr bolǵan ónimlerdi jetkerip beriw, eksport potencialı hám innovaciyalıq rawajlanıwdıń sheshiwshi faktorına aylanbaqta. Demek, institutımızda tayarlap atırǵan hár bir qánige Jańa Ózbekstan kelesheginiń dóretiwshisi bolıp esaplanadı.

Prezidentimiz Shavkat Mirziyoevtiń baslaması menen hár piyshembi mámleketimizde “Jaslar kúni” sıpatında belgilendi. Institutımızda de hár háptede studentlerdiń mashqalaların tıńlaw, baslamaların qollap-quwatlaw hám anıq sheshimler qabıllaw sisteması engizilmekte. Sonday-aq, pitkeriwshi jaslardıń bántligin támiyinlewge qaratılǵan keń kólemli jumıslar ámelge asırıladı. Institutta dual bilimlendiriw sistemasın engiziw, óndiris kárxanaları menen integraciyanı bekkemlew arqalı studentlerdi oqıw procesinen-aq ámeliy jumısqa tartıw hám olar ushın turaqlı jumıs ornın jaratıw áhmiyetli wazıypa sıpatında belgilep alınbaqta.

Jaslar isbilermenligin qollap-quwatlaw ushın qosımsha 200 million dollar ajıratılıwı, kredit muǵdarlarınıń 300 million sumnan 10 milliard sumǵa shekem arttırılıwı – bul mámleketimiz tárepinen jaratılıp atırǵan úlken imkaniyat bolıp esaplanadı. “Keleshek isbileri”, “Kómek”, “Meniń birinshi kásibim” baǵdarlamaları sheńberinde girewsiz 20 million sumǵa shekem, jańa biznes baslap atırǵanlarǵa 300 million sumǵa shekem, jumısın keńeytiriwshilerge 2 milliard sumǵa shekem, 5 pitkeriwshini jumısqa alǵanlarǵa 10 milliard sumǵa shekem kreditler ajıratıladı.

“Keleshekke qádem” baslaması hám innovaciyalıq xablar ideyası jaslar ushın jańa imkániyatlar esigin ashtı. Bul baslama arqalı jaslar óz ideyaları hám startapların ámelge asırıw, zamanagóy texnologiyalar menen islesiw hám óz potencialın júzege shıǵarıw imkániyatına iye boladı. Prezidentimizdiń bul baslaması, jaslardı isbilermenlikke keńnen tartıw siyasatına tolıq sáykes keledi. “Jańa áwlad isbilermenleri” baǵdarlaması sheńberinde Garvard universiteti hám Stenford universiteti sıyaqlı abıraylı joqarı oqıw orınları menen birgelikte 40 mıń jastı bizneske oqıtıw rejelestirilgeni – global básekige turarlı kadrlar tayarlawǵa xızmet etedi. Institutımızda jaslardıń shet tillerine bolǵan qızıǵıwshılıǵın jáne de arttırıw, iyelengen shet tili sertifikatlarınıń sanın kóbeytiw, sırt ellik qospa bilimlendiriw baǵdarlamaların jolǵa qoyıw tiykarǵı wazıypa bolıp qaladı.

“Innovaciyalıq startaplar”ǵa 100 mıń dollarǵa shekem investiciya kirgiziwge ruxsat beriliwi, “Ósiw hám rawajlanıw” baǵdarlaması sheńberinde 2 milliard sum ajıratılıwı awıl xojalıǵı tarawında bilim alıp atırǵan jaslar ushın keń jol ashadı. Texnikum hám joqarı bilimlendiriw mákemelerinde startaplarǵa 1 milliard sumǵa shekem qarjılay járdem beriliwi bolsa jaslardıń ilimiy-ámeliy izleniwine tiykar jaratıladı. “Meniń birinshi kásibim” baǵdarlaması arqalı pitkeriwshilerge ayına 2 million sumǵa shekem stajirovka stipendiyasınıń tóleniwi pitkeriwshilerimiz ushın úlken tájiriybe mektebi bolıp esaplanadı. “Work and travel” baǵdarlamaları hám sırt el stajirovkaları arqalı studentlerimiz xalıqaralıq miynet bazarına shıǵıwına imkaniyat jáne de keńeyedi.

“Kitapqumarlıq mádeniyatın rawajlandırıw” qorı arqalı dóretiwshilerge ayına 20 million sum haqı tóleniwi, eń belsendi kitapqumarlarǵa sıylıq beriliwi – jaslardıń mánawiyatın arttırıwǵa xızmet etedi. Institutımızda da kitapqumarlıqtı úgit-násiyatlaw, ilimiy pikirlew hám ideologiyalıq immunitetti bekkemlew boyınsha sistemalı jumıslar jáne de kúsheytiledi. Institutta jaslar arasında kitapqumarlıqtı úgit-násiyatlawǵa qaratılǵan tańlawlardıń túrleri keńeytiledi.

Húrmetli kásiplesler! Búginnen baslap hár birimiz jaslar menen islesiwdiń pútkilley jańa sistemasına ótiwimiz shárt. Prezidentimiz belgilep bergen wazıypalardıń orınlanıwı institutımızda anıq “jol kartası” tiykarında támiyinlenedi.

Áziz student-jaslar! Búgin Sizlerge keń imkániyatlar esigi ashılmaqta – grantlar, startap joybarlar ushın kreditler, investiciyalar, kásiplerdi iyelewge baylanıslı jańa baǵdarlamalar, xalıqaralıq bilim alıw imkániyatları usılardıń qatarına kiredi. Házirgi waqıtta Sizlerden bilim alıw, kásip-óner úyreniw, shet tillerin iyelew hám jaratılǵan keń imkániyatlardan nátiyjeli paydalanıw talap etiledi.

Birgelikte keleshegimiz tiykarı bolǵan Jańa Ózbekstandı joqarı bilim, ilimiy potencial hám zamanagóy texnologiyalar tiykarında birgelikte qurıwımızǵa isenemen!

Húrmet penen,

Qaraqalpaqstan awıl xojalıǵı hám agrotexnologiyalar

institutı rektorı w.w.a. N.A.Absattarov.