Qıtay ilimpazları hám studentleri Qaraqalpaqstan awıl xojalıǵı hám agrotexnologiyalar institutında
“Jazǵı mektep-2026” baǵdarlaması sheńberinde Qıtaydıń jetekshi ilimiy mákemeleri – CRAES hám Geografiya ilimleri jáne tábiyǵıy resurslar izertlewleri institutınıń wákilleri institutımızǵa keldi.
2026-jıl 2-5-sentyabr kúnleri bolıp ótken ushırasıwda miymanlar instituttıń bilimlendiriw baǵdarları, xalıqaralıq reytinglerdegi ornı hám perspektivalı joybarları menen tanıstırıldı. Qıtaylı ilimpazlar hám studentler GIZ járdeminde shólkemlestirilgen oqıw-ilimiy laboratoriya, “Agrokimyo hám topıraqtanıw” jáne Awıl xojalıǵı ónimlerin saqlaw hám qayta islew laboratoriyalarınıń jumısı, Aralboyı topıraǵınıń shorlanıw mashqalaları boyınsha alıp barılıp atırǵan izertlewler menen jaqınnan tanıstı.
Ushırasıw dawamında qatnasıwshılar institut átirapındaǵı aymaqlar menen tanıstı. Atap aytqanda, studentlerdiń teoriyalıq bilimlerin ámeliyat penen úylestiriwge xızmet etetuǵın oqıw-tájiriybe dala baǵlarınıń jumısı menen jaqınnan tanıstı. Ushırasıw juwmaǵında tárepler 2026-2027-oqıw jılınan baslap strategiyalıq Birge islesiw memorandumına qol qoyıwǵa kelisip aldı. Bul memorandum tiykarında kelesi 5 jıl dawamında studentler, magistrantlar hám jas izertlewshilerdiń almasıwı jolǵa qoyılatuǵını belgilendi.
