«Sawap isti hár kim hár kúni islewi kerek!»

 Xalıq danalıǵında «jaqsıdan baǵ qaladı» degen gáp biykarǵa aytılman. Sebebi baǵ óziniń hár qıylı miyweleri menen hár bir shańaraqtıń dasturxanın toltırsa, gózzal tábiyatı menen qorshaǵan ortalıqtı kóklerge bóleydi. Húrmetli Prezidentimiz tárepinen 2025 jılǵa «Qorshaǵan ortalıqtı qorǵaw hám jasıl ekonomika» jılı dep at beriwiniń de mánisi bar. Búgingi kúnde dúnya xalıqlarında jasıl tábiyattı asıraw, qorshaǵan ortalıqtı hár qıylı zıyanlı shıǵındılardan saqlaw aktual máselelerden esaplanadı.

 Qaraqalpaqstan awıl xojalıǵı hám agrotexnologiyalar institutı «Gumanitar pánler hám tiller» kafedrasınıń professor-oqıtıwshılar tárepinen qorshaǵan ortalıqtı saqlaw hám jasıl mákan akciyası sheńberinde sawaplı iske qol urdı.

Institutımızǵa biriktirilgen «Jas áwlad» hám «Qumbız awıl» mákan puqaralar jıyını aymaǵında jasaytuǵın kem támiyinlengen, járdemge mútáj shańaraqlarǵa kafedra jámááti tárepinen 200 túp miywe nálleri úy tamarqalarına egip berildi.

 «Qumbız awıl» MPJ baslıǵı Qalimbetova Almagul hám hákim járdemshisi Ilyasov Muxammed penen birgelikte kafedramızdıń bir qatar oqıtıwshıları aymaqta dizimge alınǵan kem támiyinlengen, járdem mútáj shańaraqlarǵa miywe nálleri otırǵızıldı.

Atap aytqanda kafedra baslıǵı Z.Kallibekova Sáwle Murınovanıń shańaraǵında bolıp ámeliy járdem kórsetti.

Sonday-aq kafedra assistent oqıtıwshısı A. Seyfullaev hám Sveta Berdimuratovanıń shańaraǵına erik miywe nállerin otırıǵızıp sawaplı iske qol urdı.

Jánede kafedra docenti B.Bekimbetov fakultet territoriyasına miywe nállerin otırǵıwda belsendilik kórsetti.

«Jas áwlad» MPJ baslıǵı A. Kudaynazarova hám hákim járdemshisi Timur Sakbergenov penen birgelikte kafedramızdıń bir qatar oqıtıwshıları aymaqta dizimge alınǵan kem támiyinlengen, járdem mútáj shańaraqlarǵa hámde mákan puqaralar jıyını imaratınıń qasındaǵı atızlarǵa miywe nállerin otırǵızıw ushın sawǵa etti.

Kafedra docenti N.Tleubergenova sózge shıǵıp berilip atırǵan miywe nálleri sortlı ekenligin aytıp onı egiw jolları boyınsha másláhátler berdi. Shańaraq iyesi Alisher Sabirov baslanǵan bunday sawaplı islerge minnetdarshılıq bildirdi.

Taǵı da kafedra assistent oqıtıwshısı Z.Allaniyazov «Jas áwlad» MPJ aymaǵında jasawshı puqara Qoylıbay Ubbiniyazovqa miywe nállerin egiw ushın sawǵa etti.

Kafedramızdıń assistent oqıtıwshısı O.Seytmuratov ta «Qumbız awıl» MPJ da jasawshı puqara Saliyma Qazaqbaevanıń shańaraǵına miywe nállerin egiw ushın tapsırdı. Onı egiw usılları hám tárbiyası boyınsha maǵıwmatlardı ayttı.

Kafedramızdıń assistent oqıtıwshısı G.Erjanova «Jas áwlad» MPJ da jasawshı puqara Sherali Ayapovqa shańaraǵına miywe nállerin egiw ushın tapsırdı.

Taǵı da kafedra assistent oqıtıwshıları J.Shamuratov hám A.Esimbetovlar da usınday sawaplı islerde ózleriniń belsendilik háreketleri menen qatnastı hám miywe nállerin sawǵa etti. Ulıwma aytqanda kafedramız professor-oqıtıwshıları tárepinen alıp barılǵan bul sawaplı islerinen mákan puqaraları jıyınları baslıqları hám aymaqta jasawshı puqaralar ózleriniń minnetdarshılıǵın bildirdi.