Aldın xabar bergenimizdey, 2025-jıl 14-sentyabr kúni Aziya Rawajlanıw Bankiniń (ADB) Qubla, Oraylıq hám Batıs Aziya boyınsha vice-prezidenti mırza Yingming Yang hám de ADB wákilleri – Oraylıq hám Batıs Aziya departamenti bas direktorı Leah Gutierrez, Insan hám sociallıq rawajlanıw boyınsha úlken sektor direktorı Ayako Inagaki hám ADBnıń Ózbekstandaǵı wákilxanasınıń direktorı Kanokpan Lao-Araya xızmet saparı menen Qaraqalpaqstan Respublikasına keldi.

 Xızmet saparı sheńberinde miymanlar dáslep Nókis rayonında jaylasqan Dán hám salı ilimiy óndirislik birlespesiniń tájiriybe maydanında ótkerilgen ilajda qatnastı. Ilajda birlespeniń ilimiy-ámeliy jumısı hám erisilgen nátiyjeleri haqqında maǵlıwmat berildi.

 Bunnan soń delegaciya Qaraqalpaqstan awıl xojalıǵı hám agrotexnologiyalar institutına keldi. Miymanlardı institut rektorı B.Jollibekov kútip aldı hám instituttıń iskerligi, bar bolǵan imkaniyatlar hám ámelge asırılıp atırǵan ilimiy-ámeliy joybarlar menen tanıstırdı.

 ADB wákilleriniń saparı institut turmısında áhmiyetli waqıya bolıp, awıl xojalıǵı tarawı ushın joqarı dárejeli maman kadrlar tayarlaw hám ilimiy izertlewlerdi rawajlandırıwda xalıqaralıq birge islesiw imkaniyatların keńeytiwge xızmet etedi.