Búgin, 19-sentyabr kúni Qaraqalpaqstan awıl xojalıǵı hám agrotexnologiyalar institutı Baspasóz xızmeti baslaması menen respublikalıq hám jergilikli ǵalaba xabar quralları wákilleri ushın “1-kursqa qabıl etilgen student-jaslardı institut iskerligi menen jaqınnan tanıstırıw hám fakultetler iskerligi haqqında tolıq maǵlıwmat beriw” temasında media-tur ótkerildi.

 Ilajdı institut rektorı B.Jollibekov ashıp berdi. Ol qatnasıwshılarǵa instituttıń iskerligi, bar imkaniyatlar, xalıqaralıq maydandaǵı búgingi ornı haqqında tolıq maǵlıwmat berdi. Sonday-aq, ǴXQ wákilleri hám 1-kurs studentleriniń itibarına Yaponiyalı studentlerdiń institutımız studentleri menen birgelikte alıp barılıp atırǵan ilimiy-izertlew jumısları tanıstırıldı hám xalıqaralıq birge islesiw baylanısların jáne de keńeytiw máselelerinde alıp barılıp atırǵan jumıslardıń nátiyjeleri menen tanıstırıldı.

 Media-tur sheńberinde jurnalistler ushın institut boylap sayaxat shólkemlestirildi. Onda miymanlar zamanagóy ilimiy laboratoriyalar, ıssıxanalar jumısı, olardaǵı ilimiy-izertlew jumısları hám studentlerge jaratılǵan sharayatlar menen jaqınnan tanıstı.

 Ilaj juwmaǵında ǴXQ wákilleri bunday ashıq sóylesiwler tek ǵana instituttıń turmısın keńnen sáwlelendiriw emes, al bilimlendiriw sistemasındaǵı jetiskenlik hám mashqalalardı jámietke jetkeriwde de úlken áhmiyetke iye ekenin atap ótti.

 Sonday-aq, bıyıl studentlik baxtına miyasar bolǵan jaslar da óz tásirleri menen ortaqlasıp, bunday ilajlar olardı oqıw procesinde jáne de ruwxlandırıwı, bar imkaniyatlar menen jaqınnan tanısıwında úlken áhmiyetke iye ekenin ayrıqsha atap ótti.