Ózbekstan Respublikası bilimlendiriw shólkemlerine qabıllaw boyınsha Mámleketlik komissiyası májilisiniń tiyisli protokolı tastıyıqlandı.

 Oǵan bola:

 Bakalavriat tálim baǵdarlarında vakant qalǵan orınlar ushın tańlaw ótkeriledi. Bunda 56,7 ball hám onnan joqarı nátiyje kórsetken, biraq studentlikke usınıs etilmegen, sonıń ishinde, dizimnen ótiwdiń ekinshi basqıshında joqarı oqıw ornı hám bakalavriat tálim baǵdarların saylamaǵan abiturientlerge de imkaniyat jaratıladı;

 Kiriw imtixanları nátiyjelerine bola abiturientler ushın eselengen tólemli kontrakt tiykarında oqıwǵa kiriw imkaniyatı jaratıladı;

 Respublikada jumıs alıp barıp atırǵan sırt el hám mámleketlik emes joqarı oqıw orınlarına mámleketlik buyırtpaları tastıyıqlandı;

 Qaraqalpaqstan jasları ushın qosımsha grant hám tólemli kontrakt orınları ajıratıldı.

 Sonday-aq, Prezident grantı ushın ajıratılǵan kvotalardıń bilimlendiriw tarawları boyınsha bólistiriliwi hám mámleketlik joqarı oqıw orınlarınıń magistratura qánigeliklerine tańlaw nátiyjeleri tastıyıqlandı.

 Bul qarar abiturientler ushın joqarı oqıw orınlarına kiriw imkaniyatların ele de keńeytiw hám jaslardı joqarı bilimlendiriwge qamtıp alıw dárejesin arttırıwǵa xızmet etedi.