Qaraqalpaqstan awıl xojalıǵı hám agrotexnologiyalar institutında búgin Ózbekstan Respublikası “Súwretlew aynası” dóretiwshilik awqamı tárepinen shólkemlestirilgen “Tábiyattı qásterlep saqlaw – insandı, Watandı qásterlep saqlaw demek” atamasında ruwxıy-aǵartıwshılıq ilaj bolıp ótti.
 Ilajdı instituttıń Jaslar máseleleri hám ruwxıy-aǵartıwshılıq isleri boyınsha birinshi prorektorı M.Davletmuratov ashıp berip, tábiyattı qorǵaw baǵdarında jaslarda ekologiyalıq mádeniyattı qáliplestiriwdiń áhmiyetin atap ótti.

 Ilaj sheńberinde tábiyattıń insan ómiri ushın muqaddes jemis ekeni, onı qásterlep saqlaw hár bir puqaranıń minneti ekenligi ayrıqsha atap ótildi. Shıǵıp sóylegenler tárepinen ekologiyalıq mádeniyattı arttırıw, resurslardan aqılǵa uǵras paydalanıw, terek egiw, shıǵındılardı durıs saylap alıw sıyaqlı máseleler boyınsha pikir-usınıslar bildirildi.
Sonday-aq, Prezidenttiń 2025-jıl 15-maydaǵı PQ-184-sanlı qararında belgilengen “Xalıqtıń ekologiyalıq mádeniyatın arttırıw koncepciyası” haqqında maǵlıwmatlar berildi.

 Ilajda tómendegi shólkem hám wákiller qatnastı:

Ózbekstan Respublikası “Tasviriy oyina” dóretiwshilik awqamınıń baslıǵı – Isfandiyor Latipov;

Qaraqalpaqstan Respublikası Ekologiya, qorshaǵan ortalıqtı qorǵaw hám klimat ózgeriwi ministrligi – Aytjanov Askar

Ózbekstan Ekologiyalıq partiyası Qaraqalpaqstan Respublikası Keńesi – Begimova Aysanem

Ózbekstan “Milliy tiklanish” demokratiyalıq partiyası Qaraqalpaqstan Respublikası Keńesi – Tajixodjaeva Zuxra

 Ilaj dawamında miymanlar tárepinen jaslar arasında ekologiyalıq mádeniyattı arttırıw, tábiyattı qorǵaw boyınsha ámelge asırılıp atırǵan jumıslar hám keleshektegi rejeler haqqında bayanatlar berildi.

 Kórgizbe shólkemlestirildi
 Sonday-aq, “Súwretlew aynası” dóretiwshilik awqamınıń baslaması menen respublika boylap ótkerilip atırǵan kóshpeli foto hám súwretlew óneri shıǵarmalarınıń kórgizbesiniń gezektegi mánzili sıpatında institutta da dóretiwshilik jumıslar kórsetildi.

 Ilaj juwmaǵında tábiyattı qásterlep saqlaw – bul insan salamatlıǵı, onıń keleshegi hám pútkil Watannıń rawajlanıwı ushın xızmet etiw ekeni atap ótildi. Ekologiyalıq mádeniyattı arttırıwda hár bir jastıń belsendiligi hám juwapkershiligi áhmiyetli ekenligi atap ótildi.
 “Tábiyattı ájayıp halda saqlaw – keleshek áwladqa eń qımbat bahalı miyras bolıp esaplanadı,” degen ideya ilajdıń bas mazmunı bolıp xızmet etti.