Prezidentimiz tárepinen jaslarǵa qaratılıp atırǵan joqarı itibar hám ǵamqorlıq nátiyjesinde búgingi kúnde elimiz jasları ushın keń imkaniyatlar esigi ashılmaqta. Bul imkaniyatlar tek ǵana olardıń bilim hám potencialın rawajlandırıwǵa emes, al keleshekte jetik qánige, Watan rawajlanıwı ushın xızmet etetuǵın pidayı insanlar bolıp jetilisiwine bekkem tiykar jaratpaqta. Hár hápteniń piyshembi kúni “Jaslar kúni” dep belgileniwi de bul itibardıń ámeliy kórinisi bolıp esaplanadı.

🔹Qaraqalpaqstan awıl xojalıǵı hám agrotexnologiyalar institutında Ózbekstan Respublikası Awıl xojalıǵı ministriniń ruwxıy-aǵartıwshılıq jumıslarınıń nátiyjeliligin arttırıw hám mámleketlik til haqqındaǵı nızam hújjetlerine ámel etiliwin támiyinlew máseleleri boyınsha keńesgóyi Buronov Mizrob Mavlonovichtiń qatnasıwında student-jaslar menen mazmunlı ushırasıw shólkemlestirildi. Ilajdı instituttıń Jaslar máseleleri hám ruwxıy-aǵartıwshılıq isleri boyınsha birinshi prorektorı M.Dauletmuratov kiris sóz benen ashtı.

🔹Ushırasıwdıń tiykarǵı maqseti student-jaslardıń qızıǵıwshılıqların úyreniw, olardıń aldınǵı ideya hám baslamaların qollap-quwatlaw, sonday-aq, búgingi kúnde jaratılıp atırǵan jańa imkaniyatlar haqqında hár tárepleme maǵlıwmat beriwden ibarat boldı. Ilaj dawamında jaslardıń belsendiligi, bilimge qushtarlıǵı hám jańalıqqa umtılıwı ayrıqsha atap ótildi.

🔹Buronov Mizrob Mavlonovich óziniń shıǵıp sóylegen sózinde institutta jaratılǵan sharayatlar, zamanagóy laboratoriya xanaları hám bilimlendiriwdiń sapasın arttırıwǵa qaratılǵan imkaniyatlar menen jaqınnan tanısqanın atap ótip, bunday ortalıqta bilim alıp atırǵan jaslar keleshekte joqarı nátiyjelerge erisetuǵınına isenim bildirdi. Sonday-aq, ol jaslarǵa óz ústinde tınımsız islew, bilim hám kónlikpelerin jáne de bekkemlew zárúrligin ayrıqsha atap ótti.

🔹Ushırasıw dawamında Ózbekstan Respublikası Joqarı bilimlendiriw, ilim hám innovaciyalar ministrligi janındaǵı Innovaciyalıq rawajlanıw agentliginiń Qaraqalpaqstan Respublikası innovaciyalıq rawajlanıw bóliminiń jetekshi qánigesi Polatbaev Talgat Faxritdinovich hám Nókis qalası jaslar jetekshisi Lepesov Qayrat tárepinen jaslarǵa jaratılıp atırǵan jeńillikler, grantlar, startap joybarlar hám innovaciyalıq baslamalardı qollap-quwatlaw mexanizmleri haqqında tolıq maǵlıwmatlar berildi.

🔹Ilaj sońında student-jaslar ózlerin qızıqtırǵan sorawlar menen múrájat etip, qánigelerden anıq hám mazmunlı juwaplar aldı. Bul bolsa ushırasıwdıń jáne de nátiyjeli hám interaktiv ruwxta ótkeninen dárek berdi.

🔹Bunday ushırasıwlar jaslardıń dúnyaǵa kózqarasın keńeytiw, olardı erkin pikirlewge shaqırıw hám jetik kadrlar sıpatında qáliplesiwinde úlken áhmiyetke iye. Eń áhmiyetlisi, bunday sóylesiwler jaslardıń kewlinde keleshekke bolǵan isenimin bekkemlep, olarda joqarı maqsetlerge umtılıw ruwxın kúsheytedi.