Bayram múnásibeti menen institut aymaǵı milliy naǵıslar, ráńbáreń gúller hám bayram kórinisleri menen bezetilip, haqıyqıy Nawrız keypiyatın sáwlelendirdi. Ásirese, Nawrızdıń ajıralmas belgisi bolǵan súmelek tayarlaw procesi student-jaslar, ustazlar hám xızmetkerlerdiń qatnasıwında dástúriy tárizde shólkemlestirilip, úlken qazanlarda jaqsı tilekler, niyetler hám duwalar menen qaynadı. Bul process bayramǵa ózgeshe payız baǵıshladı.
Saltanatlı bayram ilajında institut rektorı wazıypasın atqarıwshı N.Absattarov, Jaslar menen islesiw, ruwxıylıq hám aǵartıwshılıq isleri boyınsha birinshi prorektor M.Dauletmuratov hám ilimiy isler boyınsha prorektor Sh. Akmalovlar shıǵıp sóylep, barlıq jámáátti Nawrız bayramı menen qızǵın qutlıqladı. Olar ózleriniń shıǵıp sóylegen sózlerinde Nawrızdıń insanıylıq, miyrim-shápáát, awızbirshilik hám jańalanıw ideyaların úgit-násiyatlaytuǵın áhmiyetli bayram ekenin ayrıqsha atap ótip, student-jaslarǵa keleshekte úlken jetiskenliklerge erisiwin tiledi.
Bayram dawamında túrli milliy oyınlar, sport jarısları hám kórgizbeler de shólkemlestirilip, qatnasıwshılardıń belsene qatnasıwı támiyinlendi. Bul ilajlar student-jaslar arasında doslıq, awızbirshilik hám salamat báseki ortalıǵın jáne de bekkemledi.
Usı Nawrız saltanatı institut turmısında áhmiyetli waqıya bolıp, barlıq qatnasıwshılarǵa báhár keypiyatı, umıtılmas máwritler hám jarqın estelikler úlestirdi.
Nawrız bayramı múnásibeti menen “Nawrızdı ulıǵlaw – insandı ulıǵlaw!” súreni astında ótkerilgen bayram ilajları joqarı dárejede, kóterińki ruwxta shólkemlestirildi. Usı bayram sheńberinde ótkerilgen seyiller milliy dástúrler, qádiriyatlar hám úrp-ádetlerdiń ayqın kórinisine aylandı. Reńbáreń teatrlastırılǵan koncert baǵdarlamalarında xalqımızdıń bay mádeniy miyrası, qosıq-namaları, ayaq oyın kórkem óneri hám saxnalıq kórinisleri keńnen kórsetilip, tamashagóylerge umıtılmas tásirler bólistirildi.
Sonday-aq, “Studentler báhári” festivalı jaslardıń dóretiwshilik potencialın júzege shıǵarıw, olardıń kórkem óner hám mádeniyatqa bolǵan qızıǵıwshılıǵın jáne de arttırıwda úlken áhmiyetke iye boldı. Festival dawamında student-jaslar ózleriniń qábiletlerin hár qıylı baǵdarlarda kórsetip, báhárgi keypiyat hám jańalanıw ruwxın jáne de ulıǵladı.
Ulıwma alǵanda, Nawrız bayramı ilajları xalqımızdıń awızbirshiligin, miyrim-shápáátin hám jaqsı qádiriyatların ulıǵlap, hár bir insannıń qálbinde maqtanısh sezimlerin bekkemledi.
