Búgin Nókis qalası “Doslıq” kanalı boyında bántlikti támiyinlew hám kámbaǵallıqtı qısqartıw máselelerine baǵıshlanǵan jaslar kórgizbesi bolıp ótti.Ilajda Qaraqalpaqstan awıl xojalıǵı hám agrotexnologiyalar institutı rektorı wazıypasın waqtınsha atqarıwshı N.Absattarov basshılıǵında institut jámááti de belsene qatnasıp, óz kórgizbelerin kórsetti.
Kórgizbe dawamında institutta ámelge asırılıp atırǵan bilimlendiriw, ilimiy-izertlew hám innovaciyalıq joybarlar, student-jaslar tárepinen jaratılǵan qollanbalar jáne awıl xojalıǵı hám agrotexnologiyalar tarawındaǵı zamanagóy jetiskenlikler keń jámiyetshiliktiń itibarına usınıldı.
Ilaj qatnasıwshıları ushın bos jumıs orınları, kásip-ónerge baǵdarlaw, isbilermenlik jumısın jolǵa qoyıw hám mámleket tárepinen jaratılıp atırǵan imkaniyatlar haqqında tolıq maǵlıwmat berildi. Ásirese, jaslardıń bántligin támiyinlew hám olardı innovaciyalıq ideyalardı ámeliyatqa engiziwge xoshametlew máselelerine ayrıqsha itibar qaratıldı.
Bul kórgizbe jaslardıń kásiplik kónlikpelerin rawajlandırıw, olardıń miynet bazarındaǵı básekige shıdamlılıǵın arttırıw hám isbilermenlik baslamaların qollap-quwatlawǵa xızmet etetuǵın áhmiyetli maydan boldı.
