Ilimiy sapardıń ekinshi kúninde Qaraqalpaqstan awıl xojalıǵı hám agrotexnologiyalar institutı delegaciyası Germaniyanıń Weihenstephan-Triesdorf University of Applied Sciences universitetinde rásmiy kútip alındı.
Sapar sheńberinde universitet professorları Prof. Maykl Troster hám prof. Iryna Troster tárepinen universitettiń tariyxı, bilimlendiriw sisteması, dual bilimlendiriw modeli, xalıqaralıq birge islesiw, akademiyalıq almasıw baǵdarlamaları, ilimiy-izertlew jumısı hám studentlerge jaratılǵan ámeliy bilimlendiriw imkaniyatları boyınsha prezentaciya ótkerildi.
Sonday-aq, ushırasıw dawamında eki joqarı bilimlendiriw mákemesi arasında Double Degree baǵdarlamasın jolǵa qoyıw, professor-oqıtıwshılar, izertlewshiler hám studentler almasıwın keńeytiw, dual bilimlendiriw sistemasın birgelikte ámelge asırıw hám qospa ilimiy joybarlardı rawajlandırıw máseleleri dodalandı.
Erisilgen kelisimlerge muwapıq, usı jıldıń sentyabr ayınan baslap Qaraqalpaqstan awıl xojalıǵı hám agrotexnologiyalar institutında nemis tilin oqıtıw kursların shólkemlestiriw belgilendi. Bul baslama student hám professor-oqıtıwshılardıń Germaniyadaǵı bilimlendiriw hám ilimiy almasıw baǵdarlamalarında belsene qatnasıwına xızmet etedi.
