Fakultet dekani Sultanov Elimbet Kalimbetovich Telefon: +99891-390-20-09, E-mail: sultanovelimbet@gmail.com

Fakultet tariyxı

    Ótken ásirdiń 70-jıllarına kelip, respublikamızda awıl xojalıǵı tarawın túpten rawajlandırıw, eń baslı talap barlıq tarawlar ushın joqarı mamanlıqtaǵı bilimge hám kónlikpege iye awıl xojalıǵı qánigelerdiń jetispewi ayqın sezildi, sonlıqtan, Húkimetimiz tárepinen Nókis mámleketlik pedagogikalıq institutı tiykarında, Nókis mámleketlik universiteti shólkemlestirilip onıń quramında Ózbekstan Respublikası Joqarı hám orta arnawlı bilimlendiriw Ministrliginiń 1976-jılı 2-fevral`daǵı qararı tiykarında «Awıl xojalıq-ekonomika» fakul`teti óz iskerligin basladı. 

    Fakul`tettiń tuńǵısh dekanı awıl xojalıǵı ilimleriniń kandidatı, docent Zaripbay Toxtabaev  boldı. Ol aldın, Qaraqalpaqstannıń awıl xojalıǵı Ministri bolıp islegen, joqarı bilimli, awıl xojalıǵı tarawın tolıq meńgergen, joqarı is tájiriybege iye insan bolıwı menen student jaslar, professor-oqıtıwshılar, elimizde bárshe húrmet etetuǵın basshı bolıp, fakul`tettiń materiallıq hám texnikalıq bazasınıń rawajlanıwı ushın bir qansha miynet isledi.

    Ol dáwirde fakul`tette 2 kafedra shólkemlestirilgen bolıp, olar  «Diyqanshılıq» hám «Awıl xojalıǵın mexanizaciyalastırıw» kafedrası bolıp,  «Awıl xojalıǵın mexanizaciyalastırıw» kafedrasın 1978-1979-jılları texnika ilimleri kandidatı, docent Salıy Dáwletaliev basqardı.

    Awıl xojalıǵın mexanizaciyalastırıw bóliminde studentler kontingentiniń hádden tıs kóp bolıwına hám kafedrada ilimiy dárejeli oqıtıwshılardıń kóbeyiwine baylanıslı 1979-jılı «Ulıwma texnikalıq pánler» hám «Awıl xojalıǵın mexanizaciyalastırıw» kafedrası bolıp qayta shólkemlestirildi. 1981-jıldan baslap, jańa «Traktorlar hám avtomobil`ler» kafedrası shólkemlestirildi. «Traktorlar, avtomobil`ler hám awıl xojalıq mashinaları» kafedrasın 1981-1985-jılları texnika ilimleriniń kandidatı Ońǵarbay Auezov, al «Ulıwma texnikalıq pánler» kafedrasın texnika ilimleri kandidatı Auesbay Utegenov basqardı. 1979-1982-jılları «Awıl xojalıǵın mexanizaciyalastırıw»  kafedrasına texnika ilimleriniń kandidatı Tolegen Bazarbaev, 1982-84-jılları «Awıl xojalıǵın mexanizaciyalastırıw»  kafedrasına texnika ilimleriniń kandidatı, docent Asqar Xojamuratov al, 1984-1987-jılları texnika ilimleri kandidatı B.A.Loc, al 1987-jıldan baslap, texnika ilimleri kandidatı, docent Sarsenbay Shamshetov  basshılıq etti.

    1991-jılǵa kelip, Qaraqalpaq mámleketlik universiteti rektoratınıń usınısı menen «Awıl xojalıǵı hám ekonomika» fakul`tetinde studentler sanıńıń keskin asıwı hám professor-oqıtıwshılardıń ilimiy dárejeliginiń joqarılawı nátiyjesinde, joqarıda atı atalǵan fakul`tet tiykarında «Agronomiya» (dekanı, awıl xojalıǵı ilimleri doktorı, professor Genjemurat Shamuratov), «Ekonomika» (dekanı, ekonomika ilimleni doktorı, professor Amaniyaz Matekeev) hám «Awıl xojalıǵın mexanizaciyalastırıw» (dekanı, texnika ilimleri kandidatı, docent Sarsenbay Shamshetov) fakul`teti bolıp shólkemlestirildi.

    Ózbekstan  Respublikası Prezidentiniń 1992-jıl 28-fevral`daǵı «Respublikada jańa oqıw orınların shólkemlestiriw haqqında»ǵı Pármanı, Ózbekstan Respublikası Ministrler Kabinetiniń 1992-jıl 11-marttaǵı qararı hám de Ózbekstan Respublikası Joqarı hám orta arnawlı bilimlendiriw ministrligi kollegiyasınıń 1992-jıl 26-aprel`degi №4/5 qararına tiykarlanıp, Qaraqalpaq mámleketlik universitetiniń «Agronomiya» hám de «Awıl xojalıǵı mexanizaciyalastırıw» fakul`tetleri bazasında Tashkent mámleketlik agrar universitetiniń Nókis filialı shólkemlestirilip, direktor lawazımında texnika ilimleri kandidatı, docent Sarsenbay Shamshetov tayınlandı, ol usı oqıw ornı direktorı lawazımında tabıslı miynet etti.  1992-1994 jılları «Awıl xojalıǵın mexanizaciyalastırıw» fakul`teti óz jumısın ámelge asırdı hám fakul`tetke texnika ilimleri kandidatı, docent Ońǵarbay Auezov basshılıq etti.

    Sońınan jáne de, 1995-2003-jılları, Tashkent mámleketlik agrar universitetiniń Nókis filialınıń studentleri hám professor-oqıtıwshıları Qaraqalpaq mámleketlik universitetiniń «Agrar» fakul`tetine ózgertilip, fakul`tet dekanı sıpatında awıl xojalıǵı ilimleri kandidatı, docent Q.Aytbaev basqardı. Agrar fakul`tetinde «Ósimliktanıw» kafedrası, baslıǵı awıl xojalıǵı ilimleri kandidatı, docent Tamara Óserbaeva, «Ulıwma texnikalıq pánler» kafedrası, baslıǵı texnika ilimleri kandidatı, docent Abdulla Radjapov (1995-2000 jıllar), texnika ilimleri kandidatı, docent Ońgarbay Auezov (2000-2003 jıllar) hám «Mashinalardan paydalanıw, isenimliligi hám ońlaw» kafedrası, baslıǵı texnika ilimleri doktorı, professor Sarsenbay Shamshetov (1995-2000 jıllar) hám texnika ilimleri kandidatı, docent Elimbet Sultanov basqardı hám olar fakul`tet professor-oqıtıwshılarınıń ilimiy dárejeligin joqarılatıw, studentlerge qánigelik talapları tiykarında bilim, kónlikpe beriw hám qaraqalpaq tilinde oqıwlıq, oqıw qollanbalar tayarlaw, baspadan shıǵarıw máselelerinde bir qansha tabıslarǵa eristi.  

    Fakul`tet 2003-2004-oqıw jılında jáne de Tashkent mámleketlik agrar universiteti Nókis filialına aylandırılıp, 2003-2004-oqıw jılı  «Agroinjeneriya» fakul`tetin texnika ilimleri doktorı, professor  Ońǵarbay Awezov basqardı. 2004-2010-jılları «Agronomiya hám awıl xojalıǵın mexanizaciyalastırıw» fakul`tetin texnika ilimleri kandidatı S.Aminov basqardı. 2010-2015-jılları fakul`tet dekanı lawazımında biologiya ilimleri kandidatı, docent N.Absattarov jumıs alıp bardı.

    Ózbekstan Respublikası Ministrler Kabinetiniń 2015-jıl 3-noyabrdegi «Awıl hám suw xojalıǵı tarawların joqarı maǵlıwmatlı kadrlar menen támiynlewdi jánede jetilistiriw is-ilajları haqqındaǵı»  311-sanlı qararına muwapıq Tashkent mámleketlik agrar universiteti Nókis filialı quramına kiritilgen ózgerislerge tiykarlanıp «Agronomiya hám awıl xojalıǵın mexanizaciyalastırıw» fakul`teti «Agronomiya» hám «Agroinjeneriya» fakultetleri bolıp qayta shólkemlestirildi hám «Agroinjeneriya» fakul`tetine texnika ilimleri kandidatı Satniyaz Allaniyazov basshılıq etti.

    Ózbekstan Respublikası Ministrler Kabinetiniń 2021-jıl 4-may kúngi «Qaraqalpaqstan awıl xojalıǵı hám agrotexnologiyalar institutın shólkemlestiriw ilajları haqqında»ǵı 275-san qararı tiykarında Qaraqalpaqstan awıl xojalıǵı hám agrotexnologiyalar institutı dúzildi. Institutta házirgi kúnde úsh fakul`tet: “Agrobiologiya hám toǵayshılıq”, “Zooinjeneriya” hám de “Awıl xojalıǵın mexanizaciyalastırıw hám suw xojalıǵı” fakul`tetleri studentlerge tereń bilim berip kelmekte.

    2023-jıldıń 25-yanvardan baslap, “Awıl xojalıǵın mexanizaciyalastırıw hám suw xojalıǵı” fakul`teti dekanı bolıp, pedagogika ilimleri doktorı, texnika ilimleri kandidatı, professor Elimbet Sultanov basshılıq etip kelmekte.

    “Awıl xojalıǵın mexanizaciyalastırıw hám suw xojalıǵı” fakul`tetinde “Awıl xojalıǵın mexanizaciyalastırıw” kafedarsı baslıǵı texnika ilimleri boyınsha filosofiya doktorı (PhD) Sapar Turdımuratov, “Suw xojalıǵı hám jerden paydalanıw” kafedrası baslıǵı, texnika ilimleri kandidtı, docent Altın Djumanazarova, “Agrobiznes hám buxgalteriya esabı” kafedrası baslıǵı, ekonomika ilimleri kandidatı, docent Batır Mirzaev  hám “Gumanitar pánler hám tiller” kafedrası baslıǵı, tariyx ilimleri kandidatı, docent Zulqumar Kanlıbekovalar hám de 90 ǵa jaqın professor-oqıtıwshılar studentlerge qánigelik sırların úyretip kelmekte.

Fakul`tette tómendegi qánigelikler tayarlanadı:

1. 60410100 – Ekonomika
2. 60410800 – Menedjment
3. 60410900-Biznesti basqarıw
4. 6042010-Yurisprudenciya (Awıl xojalıǵı tarawında)
5. 6081010-Awıl xojalıǵın mexanizaciyalastırıw
6. 6811200-Suw xojalıǵı hám melioraciya
7. 60811300-Gidrotexnika imaratları hám nasos stanciyalarınan paydalanıw
8. Jer kadastrı hám jerden paydalanıw

    Sońǵı úsh jılda fakul`tet professor-oqıtıwshıları ózleriniń ilimiy dárejeligin joqarılatıw boyınsha bir qansha ilimiy jumıslar isledi hám ilimiy jumısların juwmaqlap, dissertaciyalıq keńeslerde A.Baltaniyazov, S.Orınbaeva, S.Turdımuratov, A.Qurbaniyazov, G.Kıdırbaeva, A.Saparov, J.Baltashev, O.Seytmuratovlar ilimiy jumısların qorǵap shıqtı hám Ózbekstan Respublikası Joqarı bilimlendiriw, ilim hám innovaciyalar ministrligi Joqarı Attestaciya Komissiyası tárepinen tastıyıqlanǵan ilimiy dáreje diplomların aldı .

    Studentlerdiń ózleri tańlaǵan qánigelikleri boyınsha qánigelik talaplarına sáykes bilim, kónlikpe hám tájriybelerin jetilistiriw, oqıw rejesinde kórsetilgen májbúriy hám tańlaw pánlerden teoriyalıq bilimlerin joqarılatıw maqsetinde “Awıl xojalıǵın mexanizaciyalastırıw hám suw xojalıǵı” fakul`teti professor-oqıtıwshıları: O.Auezov, E.Sultanov, N.Reymov, A.Djumanazarova, O.Aqnazarov, B.Mirzaev, Z.Qanlıbekova, Sh.Kunnazarova, B.Utepbergenov, N.Xamidov, B.Nurabaev, I.Asamatdinov, B.Ramazanovlar  2023-jıldan usı kúnge shekem oqıwlıqlar hám oqıw qollanbalardı tayarlap baspadan shıǵardı hám olarǵa Ózbekstan Respublikası Joqarı bilimlendiriw, ilim hám innovaciyalar ministrligi tárepine baspadan shıǵarıw ruxsatnamaların aldı hám bul oqıwlıqlar hám oqıw qollanbaları fakul`tet oqıw processinde paydalanılmaqta.

    Sonday-aq, fakul`tettiń “Awıl xojalıǵın mexnizaciyalastırıw” qánigeligi studenti Dilanova Gulziba Gulimbet qızı 2024-2025 oqıw jılında Ózbekstan Respublikası Joqarı bilimlendiriw mákemeleri bakalavrları ushın shólkemlestirilgen Ózbekstan Respublikası Prezidenti mámleketlik stipendiyası iyesi boldı (Ózbekstan Respublikası Joqarı bilimlendiriw, ilim hám innovaciyalar ministrliginiń 11.12.2024-jıl 464-sanlı buyrıǵı) hám fakul`tettiń “Agrobiznes hám innovaciyalıq iskerlik” qánigeligi studenti Jaksimova Zuxra Rustem qızı 2024-2025-oqıw jılında Ózbekstan Respublikası Joqarı bilimlendiriw mákemeleri bakalavrları ushın shólkemlestirilgen Islam Kárimov mámleketlik stipendiyası iyesi (Ózbekstan Respublikası Joqarı bilimlendiriw, ilim hám innovaciyalar ministrliginiń 11.12.2024-jıl 464-sanlı buyrıǵı) boldı.