Institutta «Geografiyalıq maǵlıwmatlar texnologiyaları orayı hám laboratoriyası” nıń ashılıw máresimi bolıp ótti

Ózbekstan Respublikası Ministrler Kabinetiniń 2021-jıl 4-maydaǵı “Qaraqalpaqstan awıl xojalıǵı hám agrotexnologiyalar institutın shólkemlestiriw is-ilajları haqqında”ǵı 275-sanlı qararınıń 5-bándinde “2022-2023 oqıw jılınan baslap Qaraqalpaqstan topıraq iqlım sharayatın esapqa alıp, jer degradaciyası hám qorshaǵan átirapta monitoring ilajların zamanagóy texnologiyalar tiykarında alıp barıwda geografiyalıq maǵlıwmatlar texnologiyalarınan paydalanıw maqsetinde institut quramında Germaniyanıń Xalıqaralıq sheriklik shólkemi (GIZ, ECO-ARAL-Aral boyı aymaǵında ekologiyaǵa baǵdarlanǵan regionallıq rawajlandırıw joybarı) menen birgelikte «Geografiyalıq maǵlıwmatlar texnologiyaları» orayı hám laboratoriyasın shólkemlestiriw” wazıypası belgilep berilgen edi.

Bul wazıypalardıń orınlanıwın támiyinlew maqsetinde usı jıldıń 22-iyun kúni Qaraqalpaqstan awıl xojalıǵı hám agrotexnologiyalar institutında Germaniyanıń Xalıqaralıq sheriklik shólkemi (GIZ, ESO-ARAL-Aral boyı aymaǵı ekologiyasına baǵdarlanǵan regionallıq rawajlandırıw joybarı) menen birgelikte «Geografiyalıq maǵlıwmatlar texnologiyaları orayı hám laboratoriyası” óz jumısın basladı.
Ilajǵa Qaraqalpaqstan awıl xojalıǵı hám agrotexnologiyalar institutı rektorı E.Tóreniyazov, Ózbekstan Respublikası Awıl xojalıǵı Ministri másláhátshisi A.Shukurov, GIS, ECO-ARAL-Aral boyı aymaǵında ekologiyaǵa baǵdarlanǵan regionallıq rawajlandırıw joybarı menejeri Paul Shumaxer, Germaniya aerokosmik orayı wákili Igor Kleyn qatnastı.
-Búgnigi kúnde Awıl xojalıǵı Ministrligi hám Germaniyanıń Xalıqaralıq sheriklik shólkemi (GIZ, ECO-ARAL-Aral boyı aymaǵı ekologiyasına baǵdarlanǵan regionallıq rawajlandırıw joybarı) menen birgelikte Qaraqalpaqstan Respublikası Aral boyı regionında ekologiyalıq ortalıqtı muwapıqlastırıwǵa unamlı tásir kórsetiw boyınsha birgeliktegi joybarımız ámelge asırılmaqta,- deydi Ózbekstan Respublikası Awıl xojalıǵı Ministriniń másláhátshisi A.Shukurov.

– Joybarımızdıń áhmiyetli maqsetleriniń biri bilimlendiriw sisteması menen de birge islesiwdi jolǵa qoyıw arqalı jaslarǵa bilim beriw, innovaciyalar menen tanıstırıw hám úyretiwden ibarat.

Usı maqsette búgin Qaraqalpaqstan awıl xojalıǵı hám agrotexnologiyalar institutında Germaniyanıń Xalıqaralıq sheriklik shólkemi (GIZ, ECO-ARAL-Aral boyı aymaǵı ekologiyasına baǵdarlanǵan regionallıq rawajlandırıw joybarı) menen birgelikte «Geografiyalıq maǵlıwmatlar texnologiyaları orayı hám laboratoriyası” shólkemlestirilmekte.

Bul laboratoriyanın tiykarǵı maqseti, geografiyalıq maǵlıwmatlardı zamanagóy texnologiyalar tiykarında sistemalastırıw hám tiyisli sanlı maǵlıwmatlardı jaratıwdan ibarat.
Bul awıl xojalıǵı ushın áhmiyetli bolǵan texnologiyalardan biri. Atap aytqanda, egin maydanları, jaylaw, suw obektlerin sanlı kartalastırıwǵa xızmet qılatuǵın sistema.
Bunnan birinshi náwbette studentler, ámeliyatshılar, islep shıǵarıwshı qániygeler paydalanıwı múmkin hám bul bilimlendiriw, ilim hám islep shıgarıwdı integraciya qılatuǵın janá oray bolıp xızmet atqaradı.
Bul jasları ushın keń imkaniyatlardı jaratadı.

Ilaj dawamında qatnasıwshılar laboratoriya menen jaqınnan tanıstı hám ilajdıń ekinshi bóliminde laboratoriyanıń xızmet hám wazıypaların keń túrde túsindiriwge baǵdarlanǵan seminar-trening bolıp ótti.