Ózbekstan Respublikası Prezidenti Sh.M.Mirziyoevtiń 2024-jıl 15-16-fevral kúnleri Ándijan wálayatına saparı dawamında alǵa qoyılǵan wazıypalar boyınsha tastıyıqlanǵan 11-sanlı bayan hám Ministrler Kabinetiniń 2025-jıl 8-yanvardaǵı 27/1-4646-sanlı tapsırmasınıń orınlanıwın támiyinlew, sonday-aq, úzliksiz bilimlendiriw sistemasında maman kadrlar tayarlaw procesin jetilistiriw, Qánigelestirilgen bilimlendiriw mákemeleri agentligi sistemasındaǵı qánigelestirilgen mektep hám mektep-internatlardı tiyisli joqarı bilimlendiriw mákemeleri menen ilimiy-pedagogikalıq integraciyasın kúsheytiw maqsetinde Ózbekstan Respublikası Joqarı bilimlendiriw, ilim hám innovaciyalar ministrligi jáne Mektepke shekemgi hám mektep bilimlendiriwi ministrliginiń qospa qararına muwapıq Qaraqalpaqstan awıl xojalıǵı hám agrotexnologiyalar institutınıń professor-oqıtıwshılar jámááti Taxtakópir rayonı qánigelestirilgen mektebinde pitkeriwshi klass oqıwshıları menen ushırasıw shólkemlestirdi.

 Bul ushırasıw sheńberinde qánigelestirilgen bilimlendiriw mákemeleri hám joqarı bilimlendiriw shólkemleri arasında pán baǵdarları boyınsha integraciyanı jolǵa qoyıw, mámlekettiń rawajlanıwı ushın innovaciyalıq baslama hám ideyalardı alǵa qoyatuǵın, joqarı intellektuallıq hám ruwxıy potencialǵa iye jańa áwlad kadrların tayarlaw, pitkeriwshi oqıwshılarda zamanagóy kásiplik kónlikpelerdi qáliplestiriw boyınsha pikir alısıldı.

 Sonday-aq, 2025-2026-oqıw jılınan baslap «Ustaz-shákirt» baǵdarlamasına tiykarlanǵan oqıw-metodikalıq jumıstı jolǵa qoyıw, qánigelestirilgen mektep oqıwshıların hár jılı ótkeriletuǵın anıq hám tábiyiy pánler olimpiadalarına tartıw, hár bir oqıw jılında belgilengen reje-grafik tiykarında «Ashıq esikler kúni» ilajların shólkemlestiriw, oqıwshılar ushın ilim hám bilimlendiriwge baylanıslı úgit-násiyat jumısların alıp barıw sheńberinde ashıq sabaqlar, seminar-treningler, ushırasıwlar hám dógerekler shólkemlestiriw, sonday-aq, pitkeriwshi klass oqıwshılarınıń joqarı bilimlendiriw mákemelerinde sabaqtan tısqarı waqıtlarda tanısıw ámeliyatların ótkeriw ilajları dodalandı.