Mámleketlik komissiyasınıń protokolına muwapıq, 2025-2026-oqıw jılı ushın Qaraqalpaqstan jasları joqarı oqıw orınlarına qabıllawda tómendegi 3 qosımsha imkaniyatqa iye boladı.

 1-imkaniyat. 2025-jıl 24-30-sentyabr kúnleri Qaraqalpaqstan Respublikasında turaqlı jasaytuǵın hám kiriw imtixanlarında 68 ball hám onnan joqarı nátiyje kórsetip, mámleketlik joqarı oqıw orınlarınıń kúndizgi bilimlendiriw formasına tólemli kontrakt tiykarında studentlikke usınıs etilgen abiturientler 500 orınlıq maqsetli qabıllaw parametrleri ushın dizimnen ótedi.

 Dizimnen ótiw my.uzbmb.uz saytı arqalı ámelge asırıladı. Bunda abiturientler studentlikke usınıs etilgen joqarı oqıw ornı hám tálim baǵdarı boyınsha tańlawda qatnasadı.

 Dizimnen ótken abiturientler ótkerilgen kiriw imtixanları nátiyjesine bola toplaǵan balları izbe-izligine qatań ámel etken halda maqsetli qabıllaw parametrlerine usınıs etiledi.

 Usınıs etilgenler dizimi belgilengen tártipte rásmiylestiriw ushın tiyisli joqarı oqıw orınlarına jetkeriledi.

 2-imkaniyat. 2025-jıl 29-sentyabrden 6-oktyabrge shekem (sol kúni de) Qaraqalpaqstan Respublikasında turaqlı jasaytuǵın jáne ulıwma orta, orta arnawlı hám kásiplik bilimlendiriw shólkemlerin tamamlaǵan, sonıń ishinde, málim bir sırt el hám mámleketlik emes joqarı oqıw orınlarına tólemli kontrakt tiykarında studentlikke usınıs etilgen jaslar ushın 200 orınlıq maqsetli qabıllaw parametrlerine abiturient sıpatında dizimnen ótiw imkaniyatı jaratıladı.

 Bunda:

 Dizimnen ótiw my.uzbmb.uz saytı arqalı ámelge asırıladı;

 Dizimnen ótken abiturientler ushın 2025-jıl 12-oktyabrge shekem test sınaqları ótkeriledi;

 Ótkerilgen test sınaqları nátiyjesine bola abiturientlerdiń toplaǵan balları izbe-izligine qatań ámel etken halda maqsetli qabıllaw parametrleri sheńberinde tańlaw nátiyjeleri belgilengen tártipte rásmiylestiriw ushın 2025-jıl 17-oktyabrge shekem joqarı oqıw orınlarına jetkeriledi.

 Eskertiw: dizimnen ótken abiturientlerden Prezidenttiń PQ-4319-sanlı (14.05.2025-j.) qararına muwapıq belgilengen muǵdardaǵı tólem óndiriledi.

 Áhmiyetli. 2025-jıl 15-noyabrge shekem joqarıdaǵı 1- hám 2-imkaniyatlarǵa muwapıq maqsetli grant orınlarına qabıl etilgen studentler menen joqarı oqıw ornın pitkergennen keyin tiyisli aymaqta 3 jıl islep beriw minnetlemesin názerde tutatuǵın tórt tárepleme (aymaqlıq hákimlik, tarawlıq mámleketlik uyım (shólkem), student hám joqarı oqıw ornı arasında) shártnamalar rásmiylestiriledi.

 3-imkaniyat. Qaraqalpaqstan Respublikası Ministrler Keńesiniń múrájatına muwapıq Bilim hám mamanlıqlardı bahalaw agentligi tárepinen bakalavriat tálim baǵdarları kesiminde tólemli kontrakt tiykarında respublikalıq mámleketlik joqarı oqıw orınlarına qosımsha 7 225 orınlıq qabıllaw parametrleri tastıyıqlandı.

 Bunda bazalıq tólemli kontrakt tiykarındaǵı qosımsha qabıllaw parametrleri mámleketlik joqarı oqıw orınlarınıń bakalavriat tálim baǵdarlarına abiturient sıpatında dizimnen ótken Qaraqalpaqstan Respublikasındaǵı ulıwma orta, orta arnawlı hám professional (kásiplik) bilimlendiriw mákemelerin tamamlaǵan, ótkerilgen kiriw imtixanları nátiyjelerine bola 56,7 hám onnan joqarı ball toplaǵan, biraq studentlikke usınıs etilmegen abiturientler esabınan qáliplestiriledi.

 Tańlaw dizimleri tiyisli tártipte joqarı oqıw orınlarına belgilengen tártipte rásmiylestiriw ushın jetkeriledi.