Bilimlendiriw tarawındaǵı xalıqaralıq birge islesiwdi rawajlandırıw hám oqıtıw sapasın joqarılatıw boyınsha alıp barılıp atırǵan jumıslar sheńberinde Qaraqalpaqstan awıl xojalıǵı hám agrotexnologiyalar institutına Volgograd mámleketlik agrar universitetiniń “Agrosanaat kompleksindegi mashinalardan paydalanıw hám texnikalıq servis” kafedrasınıń docenti, texnika ilimleri kandidatı Aytmuratov Marat Tajimuratovich keldi.

 Marat Tajimuratovich “Texnologiyalıq processler hám óndirisdi avtomatlastırıw hám basqarıw” tálim baǵdarı 4-kurs studentleri ushın “Awıl xojalıǵı óndirisinde texnologiyalıq proceslerdi avtomatlastırıw” kursı boyınsha lekciyalar oqıdı. Studentler ózlerin qızıqtırǵan sorawlarǵa tolıq juwaplar aldı hám agrosanaat kompleksindegi áhmiyetli máseleler boyınsha pikir alıstı. Sabaqlar zamanagóy oqıtıw usıllarına tiykarlanǵan bolıp, studentlerge dúnya tájiriybesin úyreniw hám bilimlerin keńeytiw imkaniyatın bermekte. Sonday-aq, Marat Tajimuratovich “Awıl xojalıǵın mexanizaciyalastırıw hám suw xojalıǵı” fakultetiniń “Awıl xojalıǵın mexanizaciyalastırıw” kafedrasında oqıp atırǵan studentler, magistrantlar, doktorantlar hám professor-oqıtıwshılar ushın seminarlar ótkizdi.

 Kásiplesleri menen sáwbetlesiw waqtında Marat Tajimuratovich universitet, magistratura hám aspiranturaǵa qabıl etiw tártibi haqqında maǵlıwmat berdi. Bunnan tısqarı, docent M.T. Aytmuratov kafedrada alıp barılıp atırǵan ilimiy-izertlew jumısları menen tanıstı.