Ózbekstan Respublikası Joqarı bilimlendiriw, bilim hám innovaciyalar ministrliginiń 2026 jıl 2-avgustdaǵı 01/14-1911-sanlı tapsırması tiykarında: 2026-jıl 10-14-avgust kúnleri aralıǵında Qaraqalpaqstan awıl xojalıǵı hám agrotexnologiyalar institutı hám Beruniy agrotexnologiyaları texnikumında “Paxta teriw mashinaları mexanizatorların tayarlaw hám olardıń mamanlıǵın arttırıw boyınsha teoriyalıq hám ámeliy oqıw kursların” otiw boyınsha oqıw seminarları shólkemlestirildi.
2026-jıl 10-avgust kúni Qaraqalpaqstan awıl xojalıǵı hám agrotexnologiyalar institutında bolıp ótken oqıw seminarın Qaraqalpaqstan Respublikası Awıl xojaliǵı minister orınbasarı B.Ibrayimov, Qaraqalpaqstan awıl xojalıǵı hám agrotexnologiyalar institutı prorektorı Sh.Akmalov, “Ózagroinspekciya”nıń Qaraqalpaqstan Respublikası basqarması texnika jaǵdayın qadaǵalaw boyınsha sektor baslıǵı A.Aytjanov hám “Ózagrolizing” AJ filialı direktorı orınbasarı A.Sulaymanov, Beruniy agrotexnologiyalar texnikumında bolıp ótken oqıw seminarın Qaraqalpaqstan Respublikası Tórtkul rayonı texnikanı qadaǵalaw bólimi bas qániygesi O.Xadjiev, “Ózagrolizing” AJ filialı direktorınıń orınbasarı A.Sulaymanovlar ashıp berdi.
Bul 5 kún dawam etetuǵın oqıw seminarlarınıń tiykarǵı maqseti paxta teriw mashinalarında islewshi mexanizatorlardıń jumıs kónlikpelerin bekkemlew, zamanagóy texnikalardan nátiyjeli paydalanıw boyınsha bilimlerin arttırıw, sonday-aq, awıl xojalıǵında mexanizaciya processlerin bunnan bılay da jetilistiriwden ibarat boladı.
Oqıw seminarda Qaraqalpaqstan awıl xojalıǵı hám agrotexnologiyalar institutı “Awıl xojalıǵın mexanizaciyalastırıw” kafedrası professor-oqıtıwshılarınan S.E.Tursımuratov, N.M.Xamidov, A.S.Baltaniyazovlar, Turkiya mámlektinen «Cansa», AQSh tan «John Deere», Qıtay mámleketinen «Boshiran» hám «FM World» kompaniyalarınıń juwapker wákilleri tárepinen Qaraqalpaqstan awıl xojalıǵı hám agrotexnologiyalar institutında hám Beruniy agrotexnologiyalar texnikumında operatorlarǵa “Paxta teriw mashinalarınıń rawajlanıwı tariyxı, konstrukciyası, túrleri hám texnologiyalıq jumıs processleri”, “Paxta teriw mashinasınıń tiykarģı bólimleri, olardıń dúzilisi hám islew principin úyreniw”, “Teriw apparatın ajıratıw, tolıq jıynaw hám sazlaw processlerin orınlaw”, “Paxta teriw mashinalarınıń dvigatel, transmissiyası hám juris bólimleri hám basqa járdemshi uskeneleri” hám dásturde belgilep berilgen basqada atamalarda lekciya hám ámeliy sabaqları ótildi.
Bul ilajlar awıl xojalıǵı tarawında joqarı mamanlıqtaǵı kadrlardı tayarlaw, mexanizatorlardıń potencialın arttırıw jáne zúráátti óz waqtında hám sapalı jıynap-terip alıw processlerin jetilistiriwge xızmet etedi.
Qaraqalpaqstan awıl xojalıǵı hám agrotexnologiyalar institutı
