Qaraqalpaqstan awıl xojalıǵı hám agrotexnologiyalar institutı hám Koreyanıń NOVA AGRO kompaniyası arasında birge islesiw memorandumına qol qoyıldı
Qaraqalpaqstan awıl xojalıǵı hám agrotexnologiyalar institutında Koreya Respublikasınıń NOVA AGRO kompaniyasınıń wákilleri menen ushırasıw bolıp ótti.
Ushırasıw dawamında awıl xojalıǵı, agrotexnologiyalar, ilim, bilimlendiriw hám innovaciyalar tarawlarında óz-ara paydalı birge islesiwdi jolǵa qoyıw hám rawajlandırıw máseleleri dodalandı.
🤝 Sapar sheńberinde Koreya kompaniyasınıń wákilleri instituttıń ilimiy-ámeliy potencialı menen jaqınnan tanıstı. Sonıń ishinde, balıqshılıq, dárilik ósimlikler hám GIS laboratoriyalarına barıp, olardıń jumısı, zamanagóy úskeneleri jáne ilimiy-izertlew hám ámeliy imkaniyatları haqqında tolıq maǵlıwmat berildi.
🐟 Balıqshılıq laboratoriyasında balıq jetistiriw, kóbeytiw hám zamanagóy balıqshılıq texnologiyaların engiziw boyınsha alıp barılıp atırǵan jumıslar kórsetildi.
Dárilik ósimlikler laboratoriyasında dárilik ósimliklerdi jetistiriw, úyreniw, saqlaw hám olardan nátiyjeli paydalanıw baǵdarındaǵı ilimiy-izertlew jumısları menen tanıstırıldı.
🗺 GIS laboratoriyasında bolsa geografiyalıq málimleme sistemaları hám sanlı texnologiyalardan awıl xojalıǵında paydalanıw, jer hám egislik maydanların monitoring etiw, aymaqlardı tallaw hám zamanagóy agrotexnologiyalıq processlerdi basqarıw imkaniyatları kórsetildi.
Sóylesiwler juwmaǵında institut rektorı Dauletmuratov Muxamedali Mirzamuratovich hám NOVA AGRO kompaniyasınıń bas direktorı Jeong Gun Xo arasında birge islesiw haqqındaǵı memorandumǵa qol qoyıldı.
