Qaraqalpaqstan awıl xojalıǵı hám agrotexnologiyalar institutınıń májilisler zalında Ózbekstan Respublikası Innovaciyalıq rawajlanıw ministrligi wákilleriniń paytaxtımız Nókis qalasında jaylasqan bir qatar joqarı oqıw orınları doktorantları, magistrantları hám ilimiy izertlewge  qızıǵıwshı bir topar studentleri menen óz-ara ushırasıwı bolıp ótti.

Ilajdı usı institut direktorı, professor Elmurat Tóreniyazov kiris sóz benen ashtı hám búgingi kúni elimizde, sonıń ishinde Qaraqalpaqstan awıl xojalıǵı hám agrotexnologiyalar institutında sońǵı jılları júz berip atırǵan jańalıqlar, ilim tarawında qolǵa kirgizilip atırǵan jetiskenlikler jóninde ilaj qatnasıwshılarına keń túrde aytıp berdi hám Ózbekstan Respublikası Innovaciyalıq rawajlanıw ministrligi wákillerine jas ilimpazlardıń pikir hám usınısların tıńlaw hám olarǵa tiyisli jol-jobalar beriwge kelgeni ushın olarǵa óziniń tereń minnetdarshılıǵın bildirdi.

Bunnan soń usı ministrliktiń Aymaqlardı innovaciyalıq rawajlandırıw basqarması baslıǵı Qudratjan Yusupov sońǵı jılları Ózbekstan Respublikası Innovaciyalıq rawajlanıw ministrligi tárepinen mámleketimizde ilim hám innovaciyanı rawajlandırıw boyınsha islenip atırǵan bir qatar jumıslarǵa toqtap ótip, qaraqalpaqstanlı jaslardıń ilimdi rawajlandırıw baǵdarındaǵı ilmiy izlenisleri boyınsha pikir hám usınısları menen qızıqsındı.

Óz gezeginde respublikamızdaǵı joqarı oqıw orınlarında tálim alıp atırǵan jas ilimpazlar, studentler  hám olarǵa jol-joba berip kiyatırǵan taraw pidayıları da sózge shıǵıp, ministrliktiń juwapker xızmetkerlerine ózlerin qızıqtırǵan máseleler boyınsha múrájat etip, olarǵa tiyisli juwaplar aldı.

Ilajda Qaraqalpaqstan Respublikası aymaqlıq innovaciyalıq rawajlanıw basqarması baslıǵı Nursultan Kayupovta shıǵıp sóylep, ilaj qatnasıwshılarına basqarma tárepinen sońǵı waqıtları tarawdı rawajlandırıw boyınsha respublikamızda  islenip atırǵan jumıslar tuwralı aytıp berdi hám qatnasıwshılardıń qızıqtırǵan sorawlarına juwaplar qaytardı.

Qaraqalpaqstan awıl xojalıǵı hám agrotexnologiyalar institutı Málimleme  xızmeti