Qaraqalpaqstan awıl xojalıǵı hám agrotexnologiyalar institutında Qaraqalpaqstan Respublikası Konstituсiyası qabıl etilgenine 30 jıl tolıwı múnásibeti menen ushırasıw bolıp ótti.

Ilajdı institut rektorı E.Tóreniyazov kiris sóz benen ashtı hám basqarıp bardı. Dáslep Ózbekstan hám Qaraqalpaqstan Respublikası Mámleketlik gimnleri jańladı.

Ilajǵa Qaraqalpaqstan Respublikası Joqarǵı Keńesi Komitet baslıǵı D.Utambetov, Qaraqalpaqstan Respublikası Ádillik Ministri S.Mámbetkarimov, institut prorektori R.Ibragimova, áskerler hám student jaslar qatnastı.

Ilajda atap ótilgenindey, Qaraqalpaqstan Respublikasınıń Konstituciyası on ekinshi shaqırıq Qaraqalpaqstan Respublikası Joqarǵı sovetiniń on ekinshi sessiyasında 1993-jıl 9-aprelde qabıl etilgen bolıp, 26 bap, 6 bólim, 121-statiyadan ibarat.

Qaraqalpaqstan Respublikası Konstitutciyanıń III  babı Konstituсiyanıń hám nızamnıń ústinligi haqqında bolıp, onıń 15-statyasında Qaraqalpaqstan Respublikasında Ózbekstan Respublikası menen Qaraqalpaqstan Respublikası Konstituсiyalarınıń hám nızamlarınıń sózsiz ústinligi moyınlanadı dep kórsetilgen.

Sonday-aq. ilajda jaslar ushın jaratılıp atırǵan imkaniyatlar, awıl xojalıǵı tarawındaǵı jaslardıń bilim alıwı hám jumıs islewi ushın jaratılıp atırǵan imkaniyatlar, sonıń menen birge, institutımız studentleriniń jetiskenlikleri, olardıń ilimiy hám innovaciyalıq miynetleri haqqında  atap ótildi.

Ilaj sońında student jaslar tárepinen berilgen sorawlarǵa juwaplar berildi.