Zooinjeneriya fakulteti studentleriniń ata-anaları menen ushırasıw ótkerildi

Institutımızda oqıw jılı juwmaqlanıwı aldınan hár bir fakultet studentleriniń ata-anaları menen ushırasıw ótkerilip, olarǵa perzentleriniń jıl dawamında erisken jetiskenlikleri, sabaqqa qatnası hám óndirislik ámeliyattaǵı ózlestirgen bilim hám kónlikpeleri, sonday-aq, tártip-intizam máseleleri boyınsha sáwbetlesiwler alıp barılmaqta.

Búgin usınday ilajlardıń biri zooinjeneriya fakulteti student jaslarınıń ata-anaları qatnasıwında bolıp ótti. Ilajǵa institut rektorı E.Tóreniyazov, fakultet dekanı T.Naurızov hám fakultet tyutorları qatnastı.

Ilajda institut rektorı sózge shıǵıp, ata-ana hám oqıw ornı menen turaqlı baylanıs bolıp, birgelikte perzentiniń bilimlerdi ózlestiriwin, imtixanlardı nátiyjeli tapsırıwın hám tártip-intizamın qadaǵalap barsa biz hám siz óz maqsetimizge erisip, jámiyetimiz ushın kerekli bolǵan maman qániygeler jetilisiwine óz úlesimizdi qosqan bolamız dep atap ótti.

Sonday-aq, perzentlerini;ıń bos waqıtların únemli paydalanıwǵa baǵdarlaw, jat illetlerden awlaq saqlawǵa, watansúyiwshilik ruwxında táriyalawǵa, sport penen shuǵıllanıw, kitaplar oqıw hám de ózleriniń qániygeliklerinen kelip shıǵıp, ilimiy izlenisler alıp barıwda olarǵa járdemlesiw, olar menen pikirlesip, qızıǵıwshılıqların ámelge asırıwǵa imkaniyat jaratıw boyınsha sáwbet alıp barıldı.

Sáwbet dawamında fakultet dekanı studentlerdiń kiyiniw mádeniyatı, internet, sociyallıq tarmaqlardan paydalanıwlarda olarǵa belgilengen sheklewlerdi ornatıw boyınsha da pikirlerin bildirip ótti.

Ashıq tárizde ótkerilgen ushırasıwda ata-analar oqıw procesleri, óndirislik ámeliyat hám qániygelikler boyınsha ózlerin qızıqtırǵan sorawlarǵa juwaplar aldı.

Ushırasıw sońında ata-analar institutta jaratılǵan imkaniyatlar menen tanısıp, laboratoriya xanaları hám studentlerdiń dala tájriybe maydanların barıp kórdi hám ilimiy izleniw miynetleriniń nátiyjelerine baha berdi.