Nawrız qarsańında Qaraqalpaqstan awıl xojalıǵı hám agrotexnologiyalar institutı rektorı B.Jollıbekov Yaponiyanıń Elektro-kommunikaciyalar universiteti professorları Yo Ishigaki, Yamamoto Kayako, Hando Junjilardı kutib aldı. Kúnniń birinshi yarımında miymanlar institutımız laboratoriyaları hám paytaxtımızdaǵı Nawrız bayramı tamashaların gúzetip, xalqımız mádeniyatı, tariyxı haqqında óaǵlıwmatlarǵa iye boldı. Kúnniń ekinshi yarımında ushırasıwdıń rásmiy basqıshına ótildi.
  Qaraqalpaqstan awıl xojalıǵı hám agrotexnologiyalar institutı rektorı B.Jollıbekov institut haqqında miymanlarǵa tolıq maǵlıwmat berip ótkennen keyin, keyin bolsa professor K. Yamamoto Yaponiyanıń Elektro-kommunikaciyalar universiteti menen birge islesiw baǵdarları haqqında pikirlerin bólisti hám Yaponiyanıń Elektro-kommunikaciyalar universiteti haqqında prezentaciya isledi. Maǵlıwmat ornında, 100 jıldan aslam tariyxqa iye bul universitette 6000 nan aslam student bakalavriatura, magistratura hám doktoranturada bilim aladı, sonnan 305 studenti shet ellerden kelip bilim almaqta. Bunnan tısqarı, dúnyanıń 30 dan aslam mámleketlerinen 70 ten aslam joqarı oqıw orınları menen akademiyalıq almasıw programmaları boyınsha birge islespekte. Oraylıq Aziyada bolsa, institutımız birinshilerden bolıp bul universitet penen birge islesiwge erispekte.
   Bunnan keyin Elektro-kommunikaciyalar universiteti xalıq aralıq birge islesiw bólimi baslıǵı professor J. Hando Yaponiya húkimetiniń MEXT stipendiya programmasınıń SESS hám GECHA baǵdarları boyınsha institutımız magistrantların hám doktorantlarına Elektro-kommunikaciyalar universitetinde oqıwǵa kvota beriwdi usındı.
Bunnan keyin professor I. Yo Yaponiyanıń Sakura Science programması haqqında maǵlıwmat berdi. Bul programmada institutımız professor-oqıtıwshıları hám studentleriniń Yaponiyanıń Elektro-kommunikaciyalar universitetinde tájriybe almasıw imkaniyatları úyrenildi.
   Bunnan keyin institut rektorı B. Jollıbekov miymanlar menen birge islesiwler boyınsha pikir alısıp, olar MEXT stipendiya programması boyınsha 16 magistrant hám doktorantların, Sakura Science programması boyınsha bolsa 15 student hám professor-oqıtıwshıǵa kvota beriwge kelisip alındı.
  Sonday-aq, ushırasıwda institutımızdıń imkaniyatlarınan kelip shıǵıp yaponiyalı professorlar menen “Aqıllı awıl xojalıǵı” joybarı boyınsha birge islesiwge, awıl xojalıǵına IT tarawın hám jasalma intellekt jetiskenliklerin integraciya qılıw boyınsha da tájriybe almasıw jumısları jolǵa qoyılıwı belgilep alındı.