Joqarı hám professional bilimlendiriw mákemelerine kiriw test sınaqlarında qatnasqan abiturientler 2025-jıl 25-iyulden 8-avgustqa shekem 15 kún dawamında joqarı bilimlendiriw mákemeleri hám bilimlendiriw baǵdarların tańlawı kerek.

 Bunıń ushın my.uzbmb.uz platformasınıń “Joqarı hám professional bilimlendiriw mákemelerine qabıllaw” bólimine kirip, “Xızmetten paydalanıw” túymesi basıladı hám “JOO tańlaw” bólimine ótiledi.

 Dáslep abiturient “Tańlaw ústinligi” hám “Maqsetli qabıllaw” boyınsha óz tańlawın ámelge asıradı.

 Bunnan keyin abiturient test tapsırǵan pánler kompleksi hám bilimlendiriw tiline sáykes bolǵan besewge shekem joqarı bilimlendiriw mákemesi hám bilimlendiriw baǵdarın bilimlendiriw túri menen birge tańlaydı.

 Bunda bilimlendiriw baǵdarların bir joqarı bilimlendiriw mákemesi yamasa túrli joqarı bilimlendiriw mákemeleri sheńberinde tańlaw múmkin.

 Bilimlendiriw baǵdarların tańlap, “Saqlaw” túymesi basılǵannan soń maǵlıwmatlardı tastıyıqlaw ushın abiturienttiń telefon nomerine SMS xabar jiberiledi. SMS xabardaǵı kodtı programmaǵa kirgiziw arqalı maǵlıwmatlar tastıyıqlanadı.

 Maǵlıwmatlar tastıyıqlanǵannan soń, “Abiturientti dizimge alıw beti” qáliplestiriledi. Esap betinde abiturient tańlaǵan tańlaw ústinligi, bilimlendiriw túrleri, joqarı bilimlendiriw mákemeleri hám bilimlendiriw baǵdarları sáwlelendirilgen boladı. Júklep alıw túymesi arqalı abiturient dizimge alıw betin júklep alıwı múmkin.

 Abiturientler tálim baǵdarların tańlaw múddeti juwmaqlanbaǵanǵa shekem óz maǵlıwmatların ózgertiwi hám dizimge alıw betin qayta júklep alıwı múmkin.

 Abiturientlerdiń studentlikke usınıs etilgen yamasa usınıs etilmegenligi haqqındaǵı juwmaqlawshı tańlaw nátiyjeleri bilimlendiriw baǵdarların tańlaw tolıq juwmaqlanǵannan soń bir hápte múddette járiyalanadı.