ARALBOYI HUDUDIDA IQLIM ÖZGARISHI VA SUV TANQISLIGI SHAROITIDA QISHLOQ XÓJALIGINI RIVOJLANTIRISHNING INNOVACION TEXNIKA VA TEXNOLOGIYALARI ATAMASINDAǴI XALÍQARALÍQ ILIMIY HÁM ILIMIY-TEXNIKALÍQ KONFERENCIYA

2026-jıl 12-mart kúni Qaraqalpaqstan awıl xojalıǵı hám agrotexnologiyalar institutında “Aralboyı aymaǵında klimat ózgeriwi hám suw tamtarıslıǵı sharayatında awıl xojalıǵın rawajlandırıwdıń innovaciyalıq texnika hám texnologiyaları” atamasında xalıqaralıq ilimiy hám ilimiy-texnikalıq konferenciya bolıp ótti.

Bul konferenciyada respublika hám sırt ellerdiń jetekshi ilimpazları, professor-oqıtıwshıları, ilimiy izertlewshiler, doktorantlar hám awıl xojalıǵı tarawında jumıs alıp barıp atırǵan qánigeler qatnastı. Ilajdıń tiykarǵı maqseti Aralboyı aymaǵında baqlanıp atırǵan global klimat ózgeriwi, suw resurslarınıń azayıwı hám ekologiyalıq mashqalalar sharayatında awıl xojalıǵı óndirisin turaqlı rawajlandırıwǵa qaratılǵan zamanagóy ilimiy qatnaslar, innovaciyalıq texnika hám aldınǵı agrotexnologiyalardı dodalawdan ibarat boldı.

Konferenciya dawamında global klimat ózgeriwi hám suw tamtarıslıǵı sharayatında suw xojalıǵı hám melioraciya tarawınıń áhmiyetli mashqalaları, irrigaciya sistemaların modernizaciyalaw, jerlerdiń meliorativlik jaǵdayın jaqsılaw, shorlanıwǵa qarsı gúresiw hám suw resurslarınan aqılǵa uǵras paydalanıw máseleleri keńnen dodalandı. Sonday-aq, awıl xojalıǵında suwdı únemleytuǵın suwǵarıw texnologiyaları, sonıń ishinde, tamshılatıp suwǵarıw, jawınlatıp suwǵarıw, lazerli tegislew texnologiyaları jáne sanlı agrotexnologiyalardı engiziw boyınsha ilimiy bayanatlar usınıldı.

Ilajda Aralboyı aymaǵınıń tábiyǵıy-klimat sharayatına beyimlesken awıl xojalıǵı eginlerin jetistiriw, resurs únemlewshi agrotexnologiyalardı qollanıw, suw hám jer resurslarınan nátiyjeli paydalanıw jáne agroekologiyalıq turaqlılıqtı támiyinlew boyınsha áhmiyetli ilimiy usınıslar islep shıǵıldı.

Konferenciya juwmaǵında ilimiy izertlewlerdi ámeliyat penen integraciyalaw, innovaciyalıq texnologiyalardı óndiriske keńnen engiziw, sonday-aq, Aralboyı aymaǵında awıl xojalıǵın turaqlı rawajlandırıwǵa qaratılǵan perspektivalı joybarlardı ámelge asırıw boyınsha pikir-usınıslar bildirildi.