Ilaj aldınan Ózbekstan Respublikası hám Qaraqalpaqstan Respublikasınıń mámleketlik gimnleri jańlap, jıynalǵanlarda joqarı maqtanısh sezimlerin oyatıp ótti. Bunnan soń institut rektorı wazıypasın waqtınsha atqarıwshı N.Absattarov kiris sóz benen ilajdı ashıp, kelgen miymanlardı tanıstırdı hám barlıq qatnasıwshılardı usı qutlı sáne menen qızǵın qutlıqladı. Ol óziniń shıǵıp sóylegen sózinde Konstituciya xalqımız turmısında tutqan sheksiz orınǵa, onıń jámiyetlik rawajlanıwdaǵı áhmiyetine ayrıqsha toqtap ótti.
Keyingi sóz Qaraqalpaqstan Respublikası Joqarǵı Keńesi komitet baslıǵı Sh. Ótemisovqa berildi. Ol óziniń bayanatında Konstituciyanıń qabıl etiliwi tariyxıy burılıs bolǵanın, ol mámleket hám jámiyettiń demokratiyalıq rawajlanıw jolın belgilep beretuǵın áhmiyetli hújjet ekenin atap ótti. Sonday-aq, tiykarǵı nızamımız insan huqıqları menen erkinliklerin támiyinlew, milliy huqıq sistemasın qáliplestiriwde bekkem tiykar bolıp xızmet etip atırǵanın ayrıqsha atap ótti. Bayanatta Konstituciyanıń tiykarǵı bólimleri, ondaǵı principler, puqaralardıń huqıq hám minnetleri, mámleketlik hákimiyat sisteması jáne kirgizilgen ózgerislerdiń mazmun-mánisi keńnen sáwlelendirip berildi.
Bunnan soń Qaraqalpaqstan Respublikası sudı baslıǵınıń orınbasarı B.Qtaybekov shıǵıp sóylep, Konstituciya hár bir mámlekettiń siyasiy, huqıqıy hám ruwxıy kelbetin sáwlelendiretuǵın tiykarǵı hújjet ekenin atap ótti. Ol 1993-jıl 9-aprelde qabıl etilgen Konstituciya jańa mámleket hám jańa jámiyet qurıwda bekkem tiykar bolıp xızmet etkenin, áyne usı hújjet arqalı jámiyetlik turmıstıń barlıq tarawların tártipke salatuǵın jetik huqıqıy sistema qáliplestirilgenin ayrıqsha atap ótti.
Ilaj dawamında Qaraqalpaqstan Respublikası Prokuraturası bólim baslıǵı A.Abdikarimov shıǵıp sóylep, Konstituciya qabıl etilgen kún xalqımız tariyxındaǵı áhmiyetli sáne ekenin atap ótti. Ol Konstituciyamız statyalarında insan huqıqları, erkinlikleri hám mápleri ústin áhmiyet iyeleytuǵının, bul normalar xalıqaralıq huqıqtıń ulıwma tán alınǵan principleri, sonıń ishinde, insan huqıqları pútkil jer júzilik deklaraciyasına tolıq sáykes keletuǵının atap ótti. Konstituciya xalıq abadanlıǵı, jámiyet turaqlılıǵı hám ádillik principlerin támiyinlewshi bas nızam sıpatında bárqulla xızmet etetuǵınına isenim bildirildi.
Ushırasıw sońında student-jaslar belsene qatnasıp, miymanlarǵa ózlerin qızıqtırǵan sorawlar menen múrájat etti. Qánigeler tárepinen berilgen tolıq hám tiykarlanǵan juwaplar jaslardıń huqıqıy bilimlerin jáne de bekkemlewge xızmet etti.
Bul ilaj tek ǵana bayram ruwxında ótip qalmastan, al jaslardıń kewlinde Konstituciyaǵa húrmet, nızamlarǵa sadıqlıq hám watansúyiwshilik sezimlerin jáne de kúsheytiwge xızmet etti.
