«Úsh áwlad ushırasıwı» bolıp ótti

Ushırasıwǵa instituttı pitkergenine 40 jıl tolǵan, awıl xojalıq tarawınıń túrli baǵdarlarında jemisli miynet etip, búgingi kúnde napaqadaǵı jası úlkenler hám usı jılǵı instituttıń pitkeriwshi jasları hám olardıń ata-anaları qatnastı.

Ilajda sózge shıqqanlar, Respublikamızdaǵı awıl xojalıǵı qániygelerin tayarlawshı birden-bir oqıw ornı esaplanǵan Qaraqalpaqstan awıl xojalıǵı hám agrotexnologiyalar institutınıń tarawǵa maman qániygelerdi tayarlawdaǵı jetiskenlikleri,  professor-oqıtıwshılardıń ilimiy nátiyjeleri,  bilimlendiriw sapasın asırıwdaǵı sońǵı jańalıqları haqqında aytıp ótti.

Institut rektorı E.Tóreniyazov sózge shıǵıp, búgingi «Úsh áwlad ushırasıwı» nıń qatnasıwshılarınıń bárshesi awıl xojalıǵınıń wákilleri, olardıń biri tarawdıń rawajlanıwı usın xızmet etken nuraniy ustazlar bolsa, biri endi usı tarawdıń qániygesi sıpatında miynet jolın endi baslaw aldında turǵan búgingi pitkeriwshiler dep atap ótti. Pitkeriwshi jaslarǵa jası úlken ustazlardıń jolın berip, tarawda maman qániygeler bolıp jetisiswin tilep, olarǵa haq jol tiledi.

Usı jılda Qaraqalpaqstan awıl xojalıǵı hám agrotexnologiyalar institutın 19 tálim baǵdarı boyınsha bakalavriattıń sırtqı hám kúndizgi tálim usılı boyınsha jámi 576 studentler pitkerip, qániygeligi boyınsha diplomǵa iye boldı.

Sonday-aq, ushırasıwda atap ótilgenindey, institutta bilim sapasın asırıw maqsetinde shet el joqarı oqıw orınları menen baylanıslar ornatılǵan bolıp, házirgi kúnde 10 nan artıq shet ellerdiń joqarı oqıw orınları menen 50 den aslam shártnamalar dúzilgen.

Qaraqalpaqstan awıl xojalıǵı hám agrotexnologiyalar institutı pitkeriwshileri 2021 jıldan baslap Rossiya Federaciyasınıń jetekshi joqarı oqıw orınlarında magistratura basqıshında oqıwdı dawam etiw dásturi jolǵa qoyılǵan bolıp,  bugungi kunde 5 studentimiz Rossiya Federaciyasınıń Qubla-Ural mámleketlik agrar universiteti hámde Povolje mámleketlik texnologiya universitetlerinde oqıp atır.

2023 jıldan baslap institutımız pitkeriwshilerin Yaponiya,  Germaniya hámde basqada rawajlanǵan mamleketlerde magistratura,  doktorantura basqıshlarında oqıtıw boyınsha ameliy seminarlar hámde treningler ótkerilmekte.

Ushırasıw sońında pitkeriwshilerge diplom beriw máresimi bolıp ótti hám awıl xojalıq tarawında jemisli miynet etken tájriybeli, nuraniy ustazlar instituttıń laboratoriyaların barıp kórdi hám olarda jaratılǵan sharayatlar menen jaqınnan tanıstı.