Aldın xabar bergenimizdey, búgin 14-iyun kúni Ózbekstanda klimat ózgeriwi sharayatında aqıllı awıl xojalıǵı (Climate Smart Agriculture in Uzbekistan) atamasında seminar trening (workshop training) tiń 2-kúni sheńberinde Moynaq rayonına hám Aral teńizi tariyxı muzeyine sayaxat rejelestirilgen edi.

 Usı tiykarda Qaraqalpaqstan awıl xojalıǵı hám agrotexnologiyalar institutı rektorı Berdiyar Jollıbekov basshılıǵındaǵı seminar qatnasıwshıları Moynaq rayonında boldı.

 Ol jerde eń dáslep 1990-jıllarda qurıǵan Aral teńizi ultanına egilgen Seksewil maydanların kózden ótkerip, ol jerde búgingi kúnde ósimliklerdiń ósip rawajlanıwına tosqınlıq etip atırǵan zıyanlı faktorlar ústinde dodalawlar ótkerildi.

 Bunnan soń qurıǵan Aral teńizi ultanında shólkemlestirilgen stanciyada bolıp, ilimpazlarımız bul aymaqtıń mashqalaların sheshiw ústinde alıp barǵan is-ilajları menen tanısıp, klimat sharayatınıń ózgesheligi yamasa ózgeriwsheńliktiń keskinlesiwi bul ilimiy izertlewler ótkeriw ushın tosqınlıq bola almaytuǵınına jáne bir márte kóz jetkerdi.

 Keyingi mánzil Moynaq mámleketlik toǵar xojalıǵına qaraslı ilimiy izertlew ler bóliminde boldı hám bul jerde átirap ortalıqtı kóklemzarlastırıw maqsetinde alıp barılıp atırǵan is ilajlar menen keńnen tanıstırıldı.