Búgin, 11-iyul kúni Qaraqalpaqstan awıl xojalıǵı hám agrotexnologiyalar institutında pitkeriwshilerge diplom tapsırıw keshesi bolıp ótti.

 2021-2025-oqıw jılları aralıǵında institutımızda ózleriniń ayrıqsha bilimge bolǵan intası, ustazlarınıń bergen bilimlerin qunt penen ózlestirip, oqıwların tabıslı tamamlaǵan pitkeriwshi studentlerge diplomlar saltanatlı túrde tapsırıldı. 

 Bul máresimde institutimiz rektorı B.Jollibekov, prorektorlar, fakultet dekanları, institut jámááti, professor-oqıtıwshılar, pitkeriwshiler hám olardıń ata-anaları qatnastı.

 Ilajdı institutımız rektorı B.Jollibekov ashıp berdi hám pitkeriwshilerdi qızǵın qutlıqladı. Ol óz sózinde pitkeriwshi jaslarǵa oqıwlarıńızdı tabıslı juwmaqlap, ómirdiń jańa basqıshına qádem atar ekensiz álbette usı dárgayda basıp ótken jolıńızda ustazlarıńızdan alǵan bilim hám tájiriybelerińiz ózińiz benen aldaǵı ómir jolıńızda súenish bolatuǵının ayrıqsha atap ótip, jaslarımız mámlekettiń rawajlanıwı hám jámietiniń abadanlıǵına múnásip úles qosıwına isenim bildirdi hám aldaǵı maqsetlerine erisiwinde tilekles ekenligin aytıp ótti.

 Bunnan soń, institutımızdıń barlıq fakultetlerinen eń joqarı nátiyjelerge erisken pitkeriwshilerge diplom hám estelik sawǵaları tapsırıldı hám pitkeriwshilerdiń ata-anaları hám studentler ózleriniń minnetdarshılıqların bildirdi.