Qaraqalpaqstan awıl xojalıǵı hám agrotexnologiyalar institutında 1-kurs student-jaslarınıń qatnasıwında “Jawızlıqqa qarsı – aǵartıwshılıq penen gúres!” hám “Insan qádiri hám huqıqlarınıń ústinligi – rawajlanıw tiykarı” atamasında ushırasıw shólkemlestirildi.

 Ushırasıwdı instituttıń Jaslar menen islesiw, ruwxıylıq hám aǵartıwshılıq bóliminiń baslıǵı Tlegenov Marxabay alıp bardı.

 Ilajda Din isleri boyınsha komitettiń Qaraqalpaqstan Respublikası aymaqlıq basqarmasınıń bas qánigesi Jamalov Nurulla, Respublikalıq úgit-násiyatlawshılar toparınıń aǵzası, docent Qabıl Mambetovlar bayanatları menen qatnastı.

 Sonday-aq, ushırasıwda fakultetlerdiń jaslar máseleleri hám ruwxıy-aǵartıwshılıq isleri boyınsha dekan orınbasarları, professor-oqıtıwshılar, tyutorlar hám student-jaslar qatnastı.

 Ilaj dawamında qánigeler búgingi kúnde jaslardıń sanasına hár qıylı zıyanlı aǵımlar hám jalǵan ideyalar tásir kórsetiwge urınıp atırǵanı, bunday qáwiplerge tek ǵana ilim-aǵartıwshılıq, joqarı huqıqıy mádeniyat hám salamat dúnyaqaras penen gúresiw múmkin ekenligin atap ótti.

 Sonday-aq, studentlerge insan qádiri hám huqıqlarınıń ústinligi jámiettiń rawajlanıwı hám turaqlı rawajlanıwı ushın áhmietli tiykar ekeni haqqında tolıq túsinikler berildi.

 Ushırasıw juwmaǵında student-jaslarda ruwxıy-aǵartıwshılıq bilimlerdi arttırıw, huqıqıy sananı bekkemlew hám salamat dúnyaqarastı qáliplestiriw boyınsha áhmiyetli usınıslar berildi.