Bul abıraylı ilajda Awıl xojalıǵın mexanizaciyalastırıw hám suw xojalıǵı fakulteti “Awıl xojalıǵın mexanizaciyalastırıw” kafedrası jámááti de múnásip qatnastı. Atap aytqanda, fakultet dekanı E.Sultanov, kafedra baslıǵı S.Tursımuratovlar basshılıǵında 1-kurs magistrantı S.Gulmuratov, 4-kurs studenti J.Karimullaevlar festivalda belsene qatnastı.
Festival sheńberindegi innovaciyalıq joybarlar kórgizbesinde kafedra professorı, texnika ilimleriniń doktorı, Qaraqalpaqstan Respublikasına xızmet kórsetken oylap tabıwshı hám racionalizator O.P.Auezov tárepinen islep shıǵılǵan “Seksewil tuqımın egiwshi seyalka” qurılması kórsetildi.
Usınılǵan bul qurılma shól hám yarım shól aymaqlarında ekologiyalıq mashqalalardı saplastırıw, atap aytqanda, seksewil eginlerin mexanizaciyalasqan halda egiw procesin nátiyjeli shólkemlestiriwge qaratılǵanı menen ayrıqsha itibarǵa iye boldı. Qurılmanıń tiykarǵı abzallıqları sıpatında tuqımlardı belgilengen tereńlikte hám normativlik aralıqta jaylastırıw, miynet jumsalıwın azaytıw hám egiw procesiniń ónimdarlıǵın arttırıw imkaniyatları atap ótildi.
Festival juwmaqlarına bola, usınılǵan “Seksewil tuqımın egiwshi seyalka” qurılması tóreshiler quramı tárepinen joqarı dárejede bahalandı. Joybardıń áhmiyetliligi, ámeliy áhmyieti hám shól hám yarım shól aymaqlarında seksewil egiw procesin mexanizaciyalaw arqalı ekologiyalıq mashqalalardı jumsartıwǵa qosatuǵın úlesi ayrıqsha atap ótildi.
Tóreshiler tárepinen bul qurılmanı ámeliyatqa keńnen engiziw, sonday-aq, óndiris basqıshına alıp shıǵıw boyınsha unamlı usınıslar bildirildi. Qurılmanıń innovaciyalıq qatnası hám resurs únemlewshiligi onı perspektivalı injenerlik sheshimlerden biri sıpatında bahalanıwına tiykar boldı.
