Ushırasıwda institut rektorı hám basshılıq wákilleri miymanlardı qızǵın qutlıqlap, instituttıń tariyxı, búgingi jumısı, ilimiy potencialı, xalıqaralıq birge islesiw baylanısları hám bilimlendiriw baǵdarları haqqında tolıq maǵlıwmat berdi. Rhodes College studentleri Aralboyı aymaǵınıń ekologiyalıq mashqalaları, awıl xojalıǵın rawajlandırıw boyınsha alıp barılıp atırǵan ilimiy izlenisler hám regiondaǵı ekologiyalıq jáne sociallıq processler boyınsha ózlerin qızıqtırǵan sorawlarǵa juwap aldı. Ushırasıw doslıq hám qızǵın ruwxta ótti. Tárepler keleshekte akademiyalıq almasıw baǵdarlamaların keńeytiw, birgeliktegi ilimiy joybarlardı ámelge asırıw hám studentler arasındaǵı xalıqaralıq birge islesiwdi rawajlandırıw máselelerin dodaladı. Sapar dawamında miymanlar instituttıń Málimleme resurs orayı menen de tanıstı. Bul sapar etiw eki joqarı bilimlendiriw mákemesi arasındaǵı birge islesiw baylanısların jáne de bekkemlew hám xalıqaralıq bilimlendiriw birge islesiwin rawajlandırıwǵa xızmet etedi.
Sapar etiwdiń eń áhmietli bólimlerinen biri instituttıń zamanagóy GIZ (Geografiyalıq málimleme sistemaları) orayı hám ilimiy laboratoriyalarına shólkemlestirilgen ekskursiya boldı. Ekskursiya dawamında miymanlar awıl xojalıǵı, agrotexnologiyalar hám ekologiya baǵdarlarında alıp barılıp atırǵan ilimiy izertlewler menen jaqınnan tanısıw imkaniyatına ie boldı.
Qánigeler tárepinen Rodos kolledjiniń studentleri hám ilimpazlarına GIZ texnologiyalarınıń awıl xojalıǵı hám tábiyǵıy resurslardı basqarıwdaǵı áhmieti haqqında tolıq maǵlıwmat berildi. Olar zamanagóy programmalıq támiynatlar járdeminde jer resursların monitoring etiw, egislik maydanların tallaw, suw resurslarınan nátiyjeli paydalanıw hám ekologiyalıq jaǵdaydı bahalaw processleri menen tanıstı. Ásirese, Aralboyı aymaǵında júz berip atırǵan ekologiyalıq ózgerislerdi baqlaw hám tallawda GIZ texnologiyalarınıń qollanılıwı miymanlarda úlken qızıǵıwshılıq oyattı.
Sapar etiw baǵdarlaması sheńberinde AQShtıń Rhodes College hám Qaraqalpaqstan awıl xojalıǵı hám agrotexnologiyalar institutı studentleriniń qatnasıwında qızǵın ushırasıw shólkemlestirildi. Bul ushırasıw jaslar arasında xalıqaralıq doslıq baylanısların bekkemlew, mádeniy hám akademiyalıq tájiriybe almasıw jáne bilimlendiriw tarawındaǵı birge islesiwdi rawajlandırıw maqsetinde ótkerildi. Ushırasıw dawamında eki joqarı oqıw ornı studentleri ózleriniń bilimlendiriw procesi, qánigelik baǵdarları, ilimiy-izertlew jumısları hám studentlik turmısı haqqında prezentaciyalar ótkerdi. Studentler oqıw procesiniń ózine tán tárepleri, ámeliy sabaqlar, ilimiy joybarlar hám keleshektegi kásiplik rejeleri boyınsha óz-ara pikir alıstı.
Sonday-aq, ushırasıw soraw-juwap ruwxında dawam etip, qatnasıwshılar AQSh hám Ózbekstandaǵı joqarı bilimlendiriw sisteması, studentler ushın jaratılǵan imkaniyatlar, xalıqaralıq almasıw baǵdarlamaları, ilimiy izleniwler hám kampus turmısına baylanıslı temalarda ózlerin qızıqtırǵan sorawlarǵa juwap aldı. Bul sóylesiw studentlerdiń dúnyaǵa kózqarasın keńeytiw, sırt el bilimlendiriw tájiriybesi menen jaqınnan tanısıw hám xalıqaralıq birge islesiwdiń áhmietin tereńirek ańlawına xızmet etti.
Ushırasıwda institutta jumıs alıp barıp atırǵan YAponiya xalıqaralıq birge islesiw agentligi (JICA) wákilleri Marin hám YUna da qatnastı. Olar studentler menen óz tájiriybeleri, Ózbekstan hám YAponiya arasındaǵı bilimlendiriw birge islesiwi hám xalıqaralıq joybarlardaǵı qatnasıwları haqqında sáwbetlesti. Marin hám YUna studentlerge shet tillerin úyreniw, xalıqaralıq baǵdarlamalarda belsene qatnasıw hám túrli mádeniyat wákilleri menen nátiyjeli pikirlesiw boyınsha usınıslar berdi.
Qızǵın hám doslıq ruwxında ótken ushırasıw juwmaǵında studentler óz-ara baylanıslardı dawam ettiriw, keleshekte birgeliktegi joybarlar hám akademiyalıq almasıw baǵdarlamalarında qatnasıw tilegin bildirdi. Bul ilaj jaslar arasında mádeniyatlararalıq qarım-qatnastı rawajlandırıw, xalıqaralıq doslıqtı bekkemlew jáne bilimlendiriw hám ilim tarawındaǵı birge islesiwdi keńeytiwde úlken áhmietke ie boldı.
Miymanlar dúnyaǵa belgili bul muzeyde saqlanıp atırǵan biybaha tariyxıy, arxeologiyalıq hám mádeniy miyras úlgileri menen jaqınnan tanıstı. Muzey qánigeleri tárepinen olarǵa Qaraqalpaqstannıń bay tariyxı, áemgi civilizaciyaları, milliy úrp-ádetleri hám mádeniy miyrası haqqında tolıq maǵlıwmatlar berildi.
Ekskursiya dawamında studentler hám ilimpazlar áemgi qalalar, tariyxıy estelikler hám aymaqta alıp barılǵan arxeologiyalıq qazıwlar nátiyjesinde tabılǵan bahalı eksponatlardı úlken qızıǵıwshılıq penen tamashaladı. Atap aytqanda, Ellikqala aymaǵındaǵı áemgi qalalar, Topıraqqala, Ayazqala hám Janbasqala sıyaqlı tariyxıy esteliklerdiń maketleri, súwretleri hám ilimiy sıpatlamaları miymanlarda úlken tásir qaldırdı. Sonday-aq, olar bul esteliklerdiń Oraylıq Aziya tariyxındaǵı ornı hám áhmieti haqqında qızıqlı maǵlıwmatlarǵa ie boldı.
Muzeydiń etnografiya bóliminde miymanlar qaraqalpaq xalqınıń dástúriy turmıs tárizi, milliy kiyimleri, ónermenchilik buyımları hám xalıq ámeliy kórkem óneri úlgilerin kózden ótkerdi. Sapar dawamında Qaraqalpaqstannıń bay mádeniy miyrasın qásterlep saqlaw hám onı keleshek áwladlarǵa jetkeriw baǵdarında ámelge asırılıp atırǵan jumıslar haqqında da maǵlıwmat berildi.
Rhodes College wákilleri muzeydiń bay fondı hám siyrek ushırasatuǵın eksponatlarına joqarı baha berip, Qaraqalpaqstannıń kóp ásirlik tariyxı hám mádeniyatı menen jaqınnan tanısıw imkaniyatı jaratılǵanınan quwanıshlı ekenin bildirdi. Bul sapar etiw eki xalıq arasındaǵı mádeniy baylanıslardı bekkemlew, tariyxıy miyrastı úyreniwge bolǵan qızıǵıwshılıqtı arttırıw hám xalıqaralıq mádeniy qarım-qatnastı rawajlandırıwda úlken áhmietke ie boldı.
